काठमाडौं– उद्योगी व्यवसायीहरूले सरकारको केही नीतिका कारण अझै पनि उद्योग व्यापार तंग्रिन नसकेकोले तत्काल ठोस सुधार गर्न आग्रह गरेका छन् ।  

विराटनगरमा आयोजित मोरङ उद्योग व्यापार संघको ६८ औँ साधारण सभामा उनीहरूले प्रमुख दुई राजनैतिक दलको दुई तिहाइको सरकार भएकाले आर्थिक एजेण्डालाई अब राष्ट्रिय एजेण्डा बनाउनुपर्ने र अर्थतन्त्र सुधारका लागि ठोस कदम चाल्न माग गरेका छन् ।

उनीहरूले केही महिना यता अर्थतन्त्रमा सुधार भए पनि बजार चलायमान हुन नसकेको गुनासो गरे । मोरङ उद्योग व्यापार संघका अध्यक्ष अनुपम राठीले आर्थिक रूपमा मुलुक सम्पन्न नभए सम्म मुलुक समृद्ध मान्न नसकिने भएकाले निजी क्षेत्रको सुझावलाई आत्मसाथ गरेर अघि बढ्न आग्रह गरे ।

कार्यक्रममा उद्योग वाणिज्य तथा आपूर्ति मन्त्री दामोदर भण्डारीले उनले निजी क्षेत्रको सहकार्य र सहयोग विना मुलुकको अर्थतन्त्र समृद्ध नहुने कुरा सरकारले बुझेको र एकीकृत व्यापार रणनीति ल्याएको जानकारी दिए  । 

उनले सरकारले निजी क्षेत्रलाई अगाडि बढाउन क्रियाशील रहेकोले नै सरकारले केही ऐनहरू अध्यादेश मार्फत पारित गरेको उल्लेख गरे ।  

कार्यक्रममा सहभागी  उद्योगी व्यवसायीहरूले खुला सीमाका कारण भइरहेको अवैध व्यापार, लोडसेडिङ र केही उद्योगलाई लक्षित गरी कर प्रणाली हेरफेर जस्ता समस्याले उद्योग व्यापार सञ्चालनमा समस्या भइरहेको गुनासो गरेका थिए ।