काठमाडौं– फाइनान्सियल एक्सन टाक्स फोर्स (एफएटिएफ) ले राखेको ग्रे लिस्टबाट बाहिर निस्कन नेपालले कानुनी, नियामक र निरीक्षण लगायतका क्षेत्रमा सुधार गर्नुपर्ने अन्तर्राष्ट्रिय मुद्रा कोषले जनाएको छ । १२ मार्चमा बसेको कोषको कार्यकारी बोर्डको बैठकपछि उप–प्रबन्धक बो लीले वक्तव्यमार्फत सो बताएका हुन् ।

बोर्डको बैठकमा कार्यकारी निर्देशकहरूले नेपालको वित्तीय क्षेत्रमा देखिएको समस्यालाई गम्भीर रूपमा लिएको लीले उल्लेख गरेका छन् । 

नेपालको वित्तीय क्षेत्रका नियमन अन्तर्राष्ट्रिय मानकका आधारमा गर्नुपर्ने, ऋणको पोर्टफोलियोमाथि मूल्यांकन गर्नुपर्ने र ऋण तथा बचत सहकारी क्षेत्रको समस्या समाधानका लागि समग्र रणनीति निर्माण गरेर अगाडि बढाउनुपर्ने लीको वक्तव्यमा उल्लेख छ ।

साथै, नेपाल एफएटीएफको सूचीमा परेको विषयलाई ध्यान दिँदै बोर्डको बैठकमा सहभागी निर्देशकहरूले नेपालले सम्पत्ति शुद्धीकरण र आतङ्कवादी वित्त पोषण विरोधी कानुनी, नियामक र निरीक्षण ढाँचालाई सुधार गर्नुपर्ने विशेष जोड दिएको उप–प्रबन्धक लीले बताएका छन् ।