लण्डन – बेलायती प्रधानमन्त्री केइर स्टेइमरले युक्रेनको युद्ध विरामको योजनालाई साकार बनाउन तथा युक्रेनको रक्षाका लागि सैन्य योजना कार्यान्वयनको तहमा पुगेको बताएका छन्। उनले २९ देशका नेतासँगको भर्चुअल बैठकमा सो कुरा बताएका हुन्।

शान्ति योजनालाई बलियो बनाउन तथा युक्रेनी सुरक्षाको ग्यारेन्टी गर्न सैन्य नेता बिहीबार लन्डनमा भेला हुने समेत उनले बताए।

अमेरिकाले राखेको ३० दिने युद्ध विराममा युक्रेन सहमत भए पनि रुसले थुप्रै शर्त राखेपछि बेलायती प्रधानमन्त्रीको यो प्रतिक्रिया आएको हो।

शनिबारको बैठकमा सहभागी युक्रेनी राष्ट्रपति भोलोडोमिर जेलेन्स्कीले वार्ता मात्र नभएर ठुलो दबाबको आवश्यकता रहेको बताए। उनले रुसले शान्ति नचाहेको कुरा संसारले बुझ्न आवश्यक रहेको बताए। रुसले युद्ध विराम नगरे उनीहरूलाई अन्तिमसम्म दबाबको आवश्यकता रहेको समेत उनले बताए।

उनले युरोपेली देशले आफै हतियार बनाउन आवश्यक रहेको भन्दै अमेरिकी राष्ट्रपति डोनाल्ड ट्रम्प र रुसी राष्ट्रपति भ्लाडिमिर पुटिनसँग वार्ता आवश्यक रहेको बताए।