काठमाडौं– कोशी प्रदेशको विराटनगरमा भूमि समस्या समाधान आयोगको कार्यालय स्थापना भएको छ ।  

आइतबार कोशी प्रदेशका आन्तरिक मामिला तथा कानुन मन्त्री रेवतीरमण भण्डारी र भूमि समस्या समाधान आयोगका केन्द्रीय अध्यक्ष हरि रिजालले संयुक्त रूपमा भूमि समस्या समाधान आयोग कार्यालय उद्घाटन गरे । 

भूमि समस्या समाधान आयोगका कोशी संयोजक अनिल कृष्ण प्रसाईँले सरकारले ३ वर्षभित्र भूमिहीन सुकुम्वासी, दलित र अव्यवस्थित बसोबासीका समस्या समाधान गर्ने लक्ष्य लिएकाले आयोगले प्रभावकारी रूपमा काम गर्ने बताए ।

उनले पहिलो चरणमा सामान्य र कम जग्गा भएका सुकुम्वासीलाई पुर्जा दिने र जटिल समस्यालाई बिस्तारै समाधान गर्ने गरी काम गर्ने जानकारी दिए  ।  

मुलुकभर करिब १० लाख ९७ हजार २ सय ९८ वटा भूमिहीन सुकुम्वासी, दलित र अव्यवस्थित बसोबासोकी समस्या रहेकोमा कोशी प्रदेशमा करिब २ लाख ३० हजार सुकुम्वासीको निवेदन दर्ता रहेको छ । 

भूमि समस्या समाधान आयोग गठन भएपछि पहिलो पटक कोशी प्रदेशमा प्रदेश कार्यालय स्थापना गरिएको आयोगका केन्द्रीय अध्यक्ष हरि रिजालले जानकारी दिए ।