काठमाडौं– नेकपा माओवादी केन्द्रका सांसद लेखनाथ दाहालले प्रधानमन्त्रीले सांसद प्रभु साहलाई अपमानित गर्ने र होच्याउने काम गरेको बताएका छन् ।
आइतबार संसद् भवन नयाँ बानेश्वरमा सञ्चारकर्मीसंग कुरा गर्दै दाहालले चार दिन अघि नै प्रधानमन्त्रीलाई लिखित रूपमा दिएको प्रश्न सोध्दा उल्टै प्रतिप्रश्न गरेर प्रधानमन्त्रीले सांसद साहलाई होच्याउने काम गरेको आरोप लगाए ।
उनले प्रधानमन्त्रीलाई प्रश्न गर्न पाउने अधिकार सबै सांसदलाई रहेको भन्दै नियमावलीमा रहेर प्रश्न गर्दा प्रधानमन्त्रीको कुर्सीमा बसेको व्यक्तिलाई त्यसलाई सहज ढंगले जवाफ दिन सक्नुपर्ने उल्लेख गरे ।
प्रधानमन्त्रीको जवाफमा नियमापत्ति गर्न पाउने अधिकार सांसदलाई रहे पनि सांसद साहलाई बोल्न नदिएको उनको भनाइ छ । उनले सरकार आफ्ना विरोधी प्रति थप निरंकुश हुँदै गएको जिकिर समेत गरे ।
सांसद दाहालले सामाजिक सञ्जाल नियमनसम्बन्धी विधेयक पारित नहुँदै ऐनको कार्यान्वयन प्रधानमन्त्रीले रोष्टमबाटै गरेको टिप्पणी समेत गरे ।
आइतबार भएको प्रतिनिधि सभाको प्रश्नोत्तर कार्यक्रममा ओलीले प्रभु साहको प्रश्नको जवाफ दिएका थिएनन् ।
यो पनि पढ्नुहोस् :
प्रभुले सोधे- भारत कहिले जाने ? प्रधानमन्त्रीको जवाफ- यसमा मैले बोलिरहनु पर्दैन
प्रतिक्रिया