काठमाडौं – विवादित समुद्री क्षेत्रमा चीनले युद्धपोत तैनाथ गरेको भन्दै फिलिपिन्सले कडा निन्दा गरेको छ । आफ्नो विशेष आर्थिक क्षेत्र भनेर दाबी गर्ने समुद्री क्षेत्रमा चिनियाँ युद्धपोत तैनाथ भएपछि फिलिपिन्सले निन्दा गरेको हो ।

फिलिपिन्सले चीनलाई औपचारिक विरोधपत्र लेख्दै उत्तेजना बढाउने कुनै पनि गतिविधि नगर्न आग्रह गरेको छ । सन् २०२२ मा फर्डिनान्ड मार्कोस जुनियरले राष्ट्रपतिको जिम्मेवारी सम्हालेयता फिलिपिन्सले चीनलाई झण्डै २ सय वटा यस्ता विरोधपत्र बुझाइसकेको छ ।

हालैमात्र दक्षिण चीन सागरको स्कारबोरो शोल क्षेत्रमा चिनियाँ तटरक्षक बलका दुई वटा युद्धपोत देखा परेको थियो । तीमध्ये एउटा युद्धपोत अत्यन्त ठूलो रहेको जनाइएको छ ।

द मोनस्टर नाम दिइएको उक्त युद्धपोतको लम्बाइ १ सय ६५ मिटर छ । यो युद्धपोत चिनियाँ तटरक्षक बलको मातहतमा रहेको सबैभन्दा ठूलो ‘५९०१’ हुनसक्ने जनाइएको छ ।