काठमाडौं- नेकपा एमालेको एघारौँ महाधिवेशन चलिरहँदा अध्यक्ष केपी शर्मा ओली समूहबाट एकपछि अर्को नेताले विद्रोह गर्न थालेका छन् ।

खासगरी महासचिव पदका लागि सुरू भएको कलह अझै सकिएको छैन । महासचिवका दाबेदार प्रदीप ज्ञवालीले यो विवादका कारण बिहानै गुण्डुमा बसेको बैठकस्थल छाडेका थिए ।

ओली समूहले उपाध्यक्ष पदमा राखेका ज्ञवालीले अब भृकुटीमण्डपस्थित महाधिवेशनस्थल पनि छाडेका छन् ।

ओली पक्षबाट पदाधिकारी दाबेदारहरूबीचको विवाद नथामिँदा ईश्वर पोखरेल पक्ष उत्साहित भएको छ।

महासचिव पद नपाए कुनै पदमा नउठ्ने घोषणा चार दिनअघि नै गुण्डुमा गरेका उपमहासचिव ज्ञवाली भृकुटीमण्डपबाट बाहिरिएका हुन् ।

ज्ञवालीलाई फकाउन अध्यक्ष ओलीले उपाध्यक्ष विष्णु पौडेल, उपमहासचिव विष्णु रिमाल र पृथ्वी सुब्बा गुरुङ लगाएका थिए ।

तर शंकर पोखरेललाई महासचिव बनाइएपछि असन्तुष्ट पौडेल र गुरुङले ज्ञवालीलाई साथ दिएका छन् ।

यो विवादमा उपाध्यक्षमा राखिएका वर्तमान उपमहासचिव गुरूङले यदि ज्ञवालीलाई महासचिव नदिने भए आफूले पनि मनोनयन दर्ता नगर्ने चेतावनी ओलीलाई दिएका छन् ।

ज्ञवालीले महासचिव पदमा जान नपाए केन्द्रीय सदस्य मात्रै बस्ने यसअघि बताएका थिए । तर अब उनले त्यस पदमा पनि नबस्ने भनेर भृकुटीमण्डप छाडेका छन् ।

यो विवादमा ज्ञवालीलाई साथ दिँदै गुरुङले आफूले पनि कुनै पदमा उम्मेदवारी नदिने चेतावनी ओलीलाई दिएका छन् । ‘यदि प्रदीप ज्ञवालीलाई बोलाएर महासचिव पदमा उम्मेदवारी नदिलाउने भए म पनि कुनै पदमा उम्मेदवारी दिन्नँ’, ओलीसँग उनको भनाइ उद्धृत गर्दै प्रत्यक्षदर्शी एक नेताले भने ।