काठमाडौं- नेकपा एमालेको एघारौँ महाधिवेशनअन्तर्गत अध्यक्ष केपी शर्मा ओलीको प्यानलमा एकपछि अर्को समस्या देखिन थालेको छ।

महासचिव पदलाई लिएर उपमहासचिव प्रदीप ज्ञवाली र उपाध्यक्ष विष्णु पौडेलको तीव्र असन्तुष्टि भएकाले बेला नेताहरूले विद्रोह थालेका छन् ।

यसअघि सचिव रहेका लेखराज भट्टलाई ओलीले त्यही पदमा दोहोर्‍याउन खोज्दा असन्तुष्टि जनाए । माओवादी पृष्ठभूमिका उनले सचिव पदमा नबस्ने घोषणा गरे ।

तर अहिले अध्यक्ष ओलीले उनलाई उपमहासचिव पदमा फर्काएका छन् । उनी उपमहासचिव पदबाट लड्ने भएपछि यसअघि जनसंगठन समन्वय संयन्त्र प्रमुख भानुभक्त ढकाल सचिवमा झरेका छन् ।

उता ओ‌लीका अर्का विश्वास पात्र राजेन्द्र गौतमले विद्रोह गरेका छन् । सचिव पद नपाएपछि गुण्डुबाट रिसाएर निस्किएका उनले भृकुटीमण्डपस्थित महाधिवेशनस्थलमा आफू स्वतन्त्र भएको घोषणा गरे ।

ओली कोशीबाट सचिवमा शेरधन राई र हिक्मत कार्कीलाई समेट्दा गौतम परेनन् । ओली टीममा नपरेपछि उनले अब स्वतन्त्र बनेर उपमहासचिव पदमा उम्मेदवारी दिने भएका छन् । उनले त्यही अनुसार स्वतन्त्र बनेर उपमहासचिव पदमा नोमिनेशन गर्न लागेका हुन् ।