काठमाडौं- नेकपा एमालेको एघारौँ महाधिवेशनका लागि अध्यक्ष केपी शर्मा ओली समूहले पुरानै महासचिव शंकर पोखरेललाई दोहोर्‍याउने निर्णय गरेको छ।

अध्यक्ष ओलीले दुई दिनदेखि गुण्डुमा चलेको गुट बैठकबाट पोखरेललाई नै महासचिवमा दोहोर्‍याउने निर्णय गरेका हुन् ।

तर शंकरलाई महासचिवमा प्रस्ताव गरिएपछि अर्का दाबेदार उपमहासचिव प्रदीप ज्ञवालीले भने बैठक नै छाडेर हिँडेका छन् ।

उनी र पृथ्बी सुब्बा गुरुङले महासचिवमा दाबी गरेका थिए। तर ओलीले शंकरलाई नै निरन्तरता दिने भएपछि ज्ञवालीले आफू अब कुनै पदमा उम्मेदवारी नदिने निर्णय सुनाउँदै गुण्डुबाट बाहिरिएका हुन् ।

तर ओलीले उनलाई मंगलबारसम्म मनाएर उपाध्यक्षमा उठाउने तयारी गरेका छन् । उता पृथ्बी सुब्बालाई पनि उपाध्यक्षमा लाने तयारी ओलीको छ।

पोखरालाई महासचिवमा रोक्ने पक्षमा ज्ञवाली र उपाध्यक्ष विष्णु पौडेल थिए । त्यसमा पृथ्वी सुब्बाको पनि साथ थियो । तर ओलीले शंकरलाई नै महासचिवमा अगाडि सार्ने निश्चित भएपछि विवाद झन् बढेको छ।