काठमाडौं – बलिउड अभिनेता अर्जुन रामपालले प्रेमिका गेब्रिएला डेमेड्रियाससँग गोप्य रूपमा इन्गेजमेन्ट गरेको खुलासा गरेका छन् । हालै एउटा पोडकास्टमा सँगै देखिएका रामपाल र गेब्रिएलाले आफ्नो सम्बन्धबारे खुलेर कुरा गरेका छन् । गेब्रिएलाले उनीको चाँडै विवाह हुनसक्ने संकेत दिएकी थिइन् भने त्यसक्रममा रामपालले आफू इन्गेजमेन्ट गरिसकेको स्पष्ट परेका छन् ।

अर्जुन रामपालले यसअघि सन् १९९८ मा मोडेल मेहर जेसियासँग विवाह गरेका थिए । जसबाट उनका दुई छोरी महिका र मायरा छन्। करिब २० वर्षपछि उनीहरूको सम्बन्धविच्छेद भएको थियो ।

त्यसपछि सन् २०१९ मा रामपालले गेब्रिएलासँगको सम्बन्ध सार्वजनिक गरेका थिए। गेब्रिएलाले जुलाई २०१९ मा छोरा एरिक र सन् २०२३ मा दोस्रो छोरा एरिवलाई जन्म दिएकी छन्। करिब छ वर्षको सम्बन्धपछि यो जोडी चाँडै विवाहको तयारीमा रहेको बताइएको छ ।

रामपाल हाल फिल्म ‘धुरन्धर’ का कारण चर्चामा छन्। फिल्ममा उनले मेजर इकबालको नकारात्मक भूमिका निभाएका छन्, जसलाई दर्शक र समीक्षकबाट प्रशंसा मिलिरहेको छ। ‘धुरन्धर’ ले प्रदर्शनको नौ दिनमै तीन सय करोड रुपैयाँभन्दा बढी कमाइ गरेको छ।