काठमाडौं– भारत र श्रीलंकामा आयोजना हुने आईसीसी पुरुष टी–२० विश्वकप २०२६ का लागि नेपाल छनोट भएपछि छिमेकी भारतबाट बधाई आइरहेको छ।

काठमाडौंस्थित भारतीय दूतावासले सामाजिक सञ्जालमार्फत नेपाली टोलीलाई शुभकामना र बधाई दिएको छ । ‘भारत र श्रीलंकामा आयोजना हुने आईसीसी पुरुष टी–२० विश्वकप २०२६ मा छनोट भएकोमा नेपाल क्रिकेट टोलीलाई बधाई’, दूतावासले भनेको छ।

उता इन्डियन प्रिमियर लिग (आईपीएल) टिम चेन्नई सुपर किङ्ग्सले पनि सामाजिक सञ्जालमार्फत बधाई दिएको छ । उसले विश्वपकपका लागि छनोट भएकोमा फेसबुकमा नेपाललाई बधाई सन्देश लेखेको छ।

त्यसैगरीअर्को आईपीएल टोली राजस्थान रोयल्सले पनि नेपाली टोलीलाई शुभकामना र बधाई दिएको छ । उसले पनि मीठो बधाई सन्देशसहित नेपाली क्रिकेट टीम र नेपाल क्रिकेट एसोसियसनको प्रशंसा गरेको छ ।

ओमानमा जारी टी–२० एसिया–ईस्ट एसिया प्यासिफिक क्षेत्रीय छनोटमा उत्कृष्ट प्रदर्शन गर्दै नेपालले विश्वकपमा स्थान सुरक्षित गरेको छ। नेपालको यो उपलब्धिलाई भारत लगायत अन्तर्राष्ट्रिय क्रिकेट समुदायले प्रशंसा गर्दै बधाई दिएका छन्।