काठमाडौं – नायक अनमोल केसीलाई रुचाउने मेकरहरुले उनलाई ‘मेघा स्टार’को ट्याग दिएका छन् । उनलाई राम्रो फ्यान फलोइङ भएको हिरोका रुपमा पनि चर्चामा आउँछन् ।

तर, अनमोल फुल फ्लेज हिरो भएर १० फिल्ममा अभिनय गरे । तर, कुनैको व्यापार १० करोड पुग्न सकेको छैन । अर्थात् उनले बक्स अफिस कलेक्सन १० करोडको अनुभव लिन पाएका छैनन् ।

चलचित्र विकास बोर्डले आफ्नो २५ औं वार्षिक उत्सवमा सार्वजनिक गरेको सबैभन्दा बढी व्यापार गर्ने फिल्मको सूचीमा अनमोल अटाएनन् ।

जबकी त्यस सूचीको अन्तिमा ‘पुशपति प्रसाद २ : भष्मे डन’ छ । जसको ग्रस कलेक्सन ७ करोड ३२ लाख छ ।

अर्थात्, अनमोलको सबै फिल्मको व्यापार ‘पुशपति प्रसाद २’भन्दा कम छ ।

अहिले नेपाली फिल्महरुको व्यापार सुस्ताएको छ । तर, ‘जेरी अन टप’ले दर्शकबाट राम्रै साथ पाउने अनुमान गरिएको छ । दर्शकले यस फिल्मप्रति चासो राखेको पनि पाइएको छ । ट्रलरले फिल्मको हाइप बढाएको छ ।

सोहीकारणले अनमोललाई प्रश्न सोधिएको थियो, ‘यो फिल्मले १० करोड ग्रस कलेक्सनको अनुभव गर्ने अवसर दिन्छ ?’

अनमोल भने यो फिल्मको व्यापार उच्च हुनेमा आशावादी देखिए ।

उनले अगाडि भने, ‘प्री–बुकिङबाट पनि राम्रो छ । मेरो पनि यो फिल्मको ग्रस कलेक्सन १० करोड कटोस् भन्ने इच्छा हो ।’

अनमोल, नायिकाहरु जसिता गुरुङ र आँचल शर्मा, नायक भुवन केसी शीर्ष भूमिकामा रहको यस फिल्म असोज ३१ बाट प्रदर्शनमा आउँदै छ ।

यसको निर्देशक सुयोग गुरुङ हुन् ।

‘जेरी अन टप’ १० वर्षअघि प्रदर्शनमा आएको अनमोल स्टारर ‘जेरी’को सिक्वेल हो । ट्राभल लभ स्टोरीमा बनेको ‘जेरी’ त्यसबेलाको हिट फिल्म हो ।