काठमाडौं– मागजोगमाई गाउँपालिका ४ नामसालिङ र इलाम नगरपालिका १० गोदाक जोड्ने जोगमाई खोलामा अस्थायी डाइभर्सन बनेपछि मेची राजमार्ग सुचारु भएको छ ।
इलामको राजदुवाली खण्डको विकल्पका रूपमा आइतबारदेखि तील्केनी–जोगमाई–सिमलबोलाई हुँदै राजमार्ग जोडिने यो खण्डमा डाइभर्सन निर्माणको काम सुरु गरिएको थियो ।
निर्माण सामाग्री र सडक अवरोधका कारण यो खण्ड सुचारु गर्न चार दिन लागेको सडक डिभिजन कार्यालयका प्रमुख इञ्जिनियर पवन भट्टराईले बताए ।
‘१२ दिनदेखि राजमार्ग खोल्न सकिएको छैन, यात्रुहरूलाई सास्ती भएको छ, विपद्का बेला राहत पुर्याउन सकिएको छैन, अत्यावश्यक सामाग्रीको अभाव हुने देखेर हामी दिनरात नभनी डाइभर्सन निर्माणमा लागेका थियौ ४ दिनमा बल्ल खोल्न सकियो,’ उनले बताए ।
उनले थपे, ‘अस्थायी रूपमा यो खण्डबाट मेची राजमार्गको अवरोध हटेको छ, राजदुवालीमा पनि काम भइरहेको छ अब त्यसमा लाग्नेछौँ,’ ।
अहिले साना सवारी सहजै आवतजावत गरे पनि ठुला सवारीको हकमा एक दुई ठाउँको साँघुरो घुम्तीमा भने केही असहजता हुन सक्ने उनले बताए ।
तत्कालका लागि उक्त खण्डलाई क्रमशः राम्रो गराउँदै लैजाने उनको भनाई छ ।
सडक डिभिजन कार्यालय, जिल्ला प्रशासन कार्यालय इलामले आइतबार सरोकारवालसहित स्थलगत निरीक्षण गरेपछि राजदुवाली खण्डको विकल्पमा तील्केनीबाट मेची राजमार्ग गोदाक जोड्ने मुख्य विकल्पका रूपमा यस खण्ड मर्मत गर्ने निर्णय गरेको थियो ।
उनका अनुसार बेलासे पुल लोड धान्न सक्ने क्षमतामा नरहेको प्रारम्भिक रिपोर्ट छ । उनले भने, ‘त्यहाँबाट आवतजावत गर्न सकिँदैन । पुवाखोलामा काठको पुलबाट साना सवारी आवतजावत गराइएको सुनिएको छ । काठको भारवहन क्षमता मापन गर्ने कुनै यन्त्र छैन, हामीले मानिस मात्रै आवतजावत गर्न भनेका छौँ । सवारी वारपार गर्नु जोखिमपूर्ण हुने अवस्था छ ।’
प्रतिक्रिया