काठमाडौं – नेपाली राष्ट्रिय फुटबल टोलीका डिफेन्डर अनन्त तामाङले अखिल नेपाल फुटबल संघ (एन्फा) कारण नेपाली फुटबल जगत नै संकटमा परेको बताएका छन्।

उनले एन्फाको उदाशीनताका कारण देशको शीर्ष श्रेणीको सहिद स्मारक ए डिभिजन लिगसमेत हुन नसकेको उल्लेख गर्दै क्लबहरूले अब आफैं टिम घोषणा गरेर लिग गराउनुपर्ने सुझाव दिएका छन्।

‘मैदानबाहिरको अवस्था जस्तो भए पनि हामी खेलाडीले देशका लागि मैदानभित्र सधैं शतप्रतिशत दिएका छौं र दिनेछौं पनि,’ तामाङले भने, ‘तर अहिले लिग नहुँदा खेलाडीको करिअर अन्धकारमा परेको छ। मसँगै फुटबल सुरु गर्ने, म भन्दा अघि वा पछि खेल्न सुरु गर्ने धेरै खेलाडी देश छाडेर गइसकेका छन्।’

नेपालमा तीन वर्षदेखि ए डिभिजन लिग नहुँदा खेलाडीहरू प्रशिक्षण, सेवा–सुविधा र प्रतिस्पर्धाबाट वञ्चित भएका उनले बताए। ‘हामी बाँकी खेलाडीले जति सकिन्छ त्यति योगदान दिइरहेका छौं, तर निराशा बढ्दो छ,’ उनले भने।

हाल उनी बंगलादेशको एक क्लबमा अनुबन्धित छन् । ‘म मात्र आफ्नो बारेमा सोचेँ भने त्यो स्वार्थी निर्णय हुन्छ, किनकि फुटबल टिम गेम हो। जबसम्म राष्ट्रिय टिममा खेल्ने खेलाडीहरूले देशभित्र नियमित फुटबल खेल्न पाउँदैनन्, ठूला टिमसँग नतिजा अपेक्षा गर्नु गलत हुन्छ।’

भियतनाममा भएको ‘होम म्याच’पछि नेपालमा लिग नहुने चर्चा सुन्दा आफू अझ निराश भएको उनले बताए। ‘मैले एन्फा एकेडेमीमा प्रवेश गर्दा यस्तो परिस्थितिको सामना गर्नुपर्छ भन्ने कल्पना पनि गरेको थिइनँ,’ उनले भने।

एन्फालाई लिग सञ्चालन गर्ने जिम्मेवारी पुरा गर्न आग्रह गर्दै तामाङले क्लबहरूलाई पनि सक्रिय भूमिका खेल्न आह्वान गरे।

‘क्लबहरूले अब एन्फाको बाटो नताकेर आफैं लिग गर्ने तयारी थाल्नुपर्छ। एन्फालाई फुटबल गराउन बाध्य पार्नुपर्छ,’ उनले भने, ‘यदि अझै पनि क्लबहरू मौन रहे भने, ती केवल कागजमै सीमित हुनेछन् र खेलाडी खोज्न पनि गाह्रो हुनेछ। खेलाडी र खेललाई जोगाउनकै लागि भए पनि लिग गर्नु जरूरी छ।’