काठमाडौं– नेपाली कांग्रेसका महामन्त्रीद्वय गगन थापा र विश्वप्रकाश शर्माले विशेष महाधिवेशनको माग गर्दै सङ्कलन गरेको हस्ताक्षर आज कार्यवाहक सभापति पूर्णबहादुर खड्कालाई बुझाउने भएको छ ।

महामन्त्री थापाले सङ्कलित हस्ताक्षर आज दिउँसो ३ बजे पार्टी केन्द्रीय कार्यालय सानेपामा कार्यवाहक सभापति खड्कालाई बुझाउने तयारी छ ।

अभियानका क्रममा १४औँ महाधिवेशनमा रहेका ५४ प्रतिशतभन्दा बढी प्रतिनिधिले हस्ताक्षर गरेको दाबी गरिएको छ ।

कांग्रेसको १४औँ महाधिवेशनमा ४ हजार ७४३ महाधिवेशन प्रतिनिधि रहेका थिए । १३औँ महाधिवेशनबाट १४ औँ महाधिवेशनमा स्वतः प्रतिनिधि भएका केन्द्रीय सदस्य, पार्टी छाडेका र मृत्यु भएका प्रतिनिधि घटाउँदा हाल कायम ४५ सय ५६ जना हुन्छ । हाल कायम महाधिवेशन प्रतिनिधिमध्ये २४ सय ८७ जनाले विशेष महाधिवेशनको पक्षमा हस्ताक्षर गरेका बताइएको छ ।

महामन्त्रीद्वय थापा र शर्माले मंसिरभित्र नियमित महाधिवेशन हुन नसके विशेष महाधिवेशनको माग गर्दै आएका छन् ।