धनगढी– नेपाली कांग्रेस कैलालीले पूर्वप्रधानमन्त्री एवम् सभापति शेरबहादुर देउवा र केन्द्रीय सदस्य एवम् तत्कालीन परराष्ट्रमन्त्री डा. आरजु राणा देउवामाथि भएको सांघातिक आक्रमणको निन्दा गरेको छ । 

एक साताअघि जेन–जी पुस्ताको आन्दोलनका क्रममा बूढानीलकण्ठस्थित निवासमै भएको आक्रमणलाई कांग्रेस कैलालीले अमानवीय ढंगले बर्बरतापूर्ण आक्रण भनेको छ ।

‘लोकतन्त्रका लागि जीवन पर्यन्त अविचलित रुपमा संघर्ष गरेका हाम्रो पार्टी नेपाली कांग्रेसका आदरणीय सभापति शेरबहादुर देउवा, नेपाली कांग्रेसका केन्द्रीय सदस्य एवं निवर्तमान परराष्ट्रमन्त्री डा। आरजु राणा देउवामाथिको अमानविय बर्वरतापूर्ण भौतिक आक्रमणको घोर भत्सर्ना गर्दछौँ,’ जिल्ला सभापति नारायणदत्त भट्टद्वारा जारी विज्ञप्तिमा भनिएको छ, ‘साथै उहाँहरूको शीघ्र स्वास्थ्य लाभको कामना गर्दछौँ ।’ 

प्रदर्शनमा जेन–जी पुस्ताको भावनाविपरीत घुसपैठ गरी सरकारी संरचना, निजी घर र व्यावसायिक प्रतिष्ठानका भवनमा आगजनी भएको विज्ञप्तिमा उल्लेख छ । 

‘सरकारले क्षतिको वास्तविक आकलन गर्दै आवश्यक पुनर्स्थापना र पुनर्निर्माणको कार्य अगाडि बढाउनका साथै आन्दोलनमा घुसपैठ गरी आगजनी, तोडफोड र हिंसामा संलग्न दोषीको पहिचान गरी आवश्यक कानुनी कारबाही गर्न माग गर्दछौँ,’ विज्ञप्तिमा भनिएको छ । 

कांग्रेस कैलालीले वर्तमान परिस्थितिबाट उठ्न र पुनर्निर्माणमा जुट्न संयम, संवाद र एकता अपरिहार्य रहेकोमा पनि जोड दिएको छ ।