काठमाडौँ- न्याय परिषद्ले एकसाथ २१० जना न्यायाधीशको सरुवा गरेको छ ।

न्याय परिषद्को शुक्रबार बसेको बैठक जिल्ला र उच्च अदालतका समेत २१० न्यायाधीशहरूको एकसाथ सरुवा गरेको हो ।

यसरी सरूवामा पर्नेहरूमा विशेष अदालतका अध्यक्ष टेकनाराण कुँवरसमेत छन् । विशेष अदालतका अध्यक्ष कुँवरको उच्च अदालत जनकपुरको न्यायाधीशमा सरुवा भएको छ ।

उता सदस्यहरू तेजनारायण सिंह राईको उच्च अदालत पोखरामा सरुवा भएको छ। अर्का सदस्य रामबहादुर थापाको उच्च अदालत जनकपुरस्थित राजविराज इजलासमा सरुवा गरिएको छ।

विशेषका सदस्य एवम् न्यायाधीश मुरारीबाबु श्रेष्ठलाई उच्च अदालत जनकपुरमा सरूवा गरिएको छ । उता अर्का सदस्य रितेन्द्र थापालाई उच्च अदालत जनकपुरको वीरगञ्ज इजलासमा पठाइएको छ ।

यी सबै न्यायाधीशले विशेष अदालतमा दुई वर्ष गुजारिसकेकाले सरुवा गरिएको हो । अब विशेषमा एक वर्षअघि गएका बिदुर कोइराला बाँकी रहेका छन् ।

अध्यक्ष कुँवरसहितका न्यायाधीशको सरूवा भएपछि अब विशेषमा उच्च अदालत पाटनका न्यायाधीश सुदर्शनदेव भट्टलाई अध्यक्ष बनाएर ल्याउने तयारी न्याय परिषद्ले गरेको छ ।