काठमाडौं– प्रधानमन्त्री केपी शर्मा ओलीले देशलाई नयाँ अवस्थामा अगाडी बढाउने उद्देश्यका साथ सरकार लागिपरेको बताएका छन् ।  

शुक्रबार जनकपुरमा मधेश प्रदेश प्रहरी कार्यालयको नवनिर्मित भवन उद्घाटन गर्दै प्रधानमन्त्री ओलीले पहिलेको अवस्थामा नभई नयाँ अवस्थामा देशलाई अगाडी बढाउने उद्देश्यका साथ सरकार लागिपरेको बताएका हुन् ।

उनले भ्रष्टाचार नियन्त्रण र जनतालाई छिटो छरितो सेवा सुविधा उपलब्ध गराएर सुशासन कायम गर्न गर्नुपर्नेमा जोड दिए । 

अपराध अनुसन्धान र नियन्त्रण लगायत थुप्रै कामहरूमा नेपाल प्रहरीले ध्यान दिनुपर्ने उनले बताए । 

प्रधानमन्त्री ओलीले लागू औषध नियन्त्रणमा मधेश प्रदेशले विशेष ध्यान दिनुपर्ने उल्लेख गरे ।

उनले शान्ति सुव्यवस्था स्थापना गर्न र जनतालाई प्रारम्भिक न्याय दिने काममा प्रहरी प्रशासनले विशेष ध्यान दिने विश्वास व्यक्त गरे । 

मधेस प्रदेश सरकारको करिब २३ करोड १० लाख ४३ हजार रुपैयाँको लागतमा निर्माण भएको सुविधा सम्पन्न उक्त भवनमा ६८ वटा कोठा रहेको प्रदेश प्रहरी कार्यालय जनकपुरले जनाएको छ ।