काठमाडौं– विप्लव नेतृत्वको नेकपाले अमेरिकी विकास सहयोग मिलेनियम च्यालेन्ज कर्पोरेसन (एमसीसी) विरुद्ध काठमाडौंमा प्रदर्शन गरेको छ । 

नेपालमा एमसीसी परियोजना पुनः सक्रिय गर्ने अमेरिकाको निर्णयविरुद्ध नेकपाले शुक्रबार काठमाडौंको माइतिघरदेखि बानेश्वरसम्म विरोध प्रदर्शन गरेका हुन् ।

प्रदर्शनमा सहभागीहरूले राष्ट्रिय स्वाधीनताको रक्षा गरौँ, एमसीसी परियोजना खारेज गर लगायतका नारा लगाएका थिए । नेकपा केन्द्रीय सदस्य तथा उपत्यका इन्चार्ज माइला लामाले एमसीसी देशको हित विपरीत रहे पनि दबाबका आधारमा ठूला दलले अघि बढाएको आरोप लगाए । 

उनले नेपालमा स्थगित भइसकेको एमसीसी परियोजना पुनः सक्रिय गरेको भन्दै निरन्तर विरोध गर्ने स्पष्ट पारे ।