काठमाडौं– देउडा गायक सुरेश शाहीले नयाँ पुस्तालाई धार्मिक बनाउने सन्देश दिने गरी भजन गीत ल्याएका छन् ।

उनले भजन भए पनि क्रान्तिकारी धार्मिक गीत ल्याएको बताएका छन् । हालै युट्युबमा सार्वजनिक ‘भोले बाबा शिव भजन’ पाका पुस्तासँगै युवाहरूलाई पनि तान्ने उनले बताए । पाका पुस्ताका लागि मात्रै भजन गीत भन्ने मान्यता तोड्न यो भजन सफल हुने उनले बताए ।

यस गीतमा राम्रो भिडियोग्राफी गरिएको छ। अभिनय पनि गीतअनुसार हेर्न पाइन्छ । यो भजन गीत चपली हाइट, बूढानीलकण्ठ र रुद्रेश्वर महादेवसहितका स्थानमा सुटिङ गरिएको छ ।

यो भजन गीतमा गायक शाही, रीता केसी र पवन रानाभाटले स्वर दिएका छन् । शाही, केसी, गीतकी लेखिका सुमित्रा खड्का र दीपा पनेरुलाई पनि भिडियोमा देख्न पाइन्छ । शिवको भूमिकामा युवराज पौडेल र पार्वतीको भूमिकामा गीतकी लेखिका सुमित्रा छन् ।

करिब सात लाख खर्च गरेर यो भजन गीतको भिडियो निर्माण गरिएको देउडा गायक शाहीले बताए ।

गीतकी लेखिका तथा व्यवसायी सुमित्राले आफूले भजनबाट मनोरञ्जन क्षेत्रमा सक्रिय हुन थालेको बताइन् । आगामी दिनमा यस्ता गीत, डकुमेन्ट्री र फिल्ममा लगानी गर्ने सोच बनाएको उनले सुनाइन् । यो भजन गीत परम्परागतभन्दा फरक रहेको उनले बताइन् ।

सुरेश र सुमित्राले यो गीतबाट कमाउने भन्दा नयाँ पुस्तालाई सन्देश दिन खोजेको बताए । यो भजन शिवजीको महिना मानिने साउन र तीजलाई लक्षित गरेर ल्याएको सुमित्राले बताइन् ।

विक्रम चौहानले निर्देशन गरेको गीतका ऐरेन्जर तथा मिक्सिङगको काम पवन रानाभाटले गरेका हुन् । भिडियो सम्पादन टेकेन्द्र शाहले गरेका छन् ।