काठमाडौं– नेकपा (एकीकृत समाजवादी)ले वामदेव गौतमलाई पार्टीको तेस्रो वरीयतामा वरिष्ठ नेता बनाउने निर्णय गरेको छ ।

आलोकनगरस्थित केन्द्रीय कार्यालयमा शुक्रबार बसेको सचिवालय बैठकले गौतमलाई तेस्रो वरीयतामा वरिष्ठ नेता बनाउने निर्णय गरेको हो । 

यसअघि नै उनलाई पार्टीमा ल्याउँदा तेस्रो वरीयता दिने समझदारी बनेको थियो ।

सचिवालय बैठकले गौतमसँगै पार्टीमा आएका तीन नेतालाई पोलिटब्युरो सदस्य र नौ जनालाई केन्द्रीय सदस्य बनाउने निर्णयसमेत गरेको छ । 

सचिवालयले डीबी कार्की, तुलसी थापा र लोकनाथ धमलालाई पोलिट्ब्युरो सदस्य र विद्याप्रसाद शर्मा, रामप्रसाद अधिकारी, राधेश्याम गुप्ता, रवीन्द्र बम, इमानसिंह भारती, भगवती विष्ट, दुर्गादत्त भण्डारी, तोफा यादव, तथा मोहमद शेर बागवानलाई केन्द्रीय सदस्यमा मनोनीत गरेको छ ।

यसअघि वामदेवले आफूलाई गतिलो जिम्मेवारी चाहिने अडान राख्दै आएका थिए । उनले संगठन विभाग प्रमुखको जिम्मेवारी आफूलाई दिन माग गरिरहेका थिए । तेस्रो वरीयता पाए पनि उनलाई अहिलेसम्म विभागीय जिम्मेवारी भने दिइएको छैन ।