काठमाडौं – गत वर्ष प्रदर्शनमा आएको सुपरहिट फिल्म ‘१२ गाउँ’को सिक्वेल निर्माणलाई थाती राख्दै नायक विराज भट्टले फिल्म ‘राम नाम सत्य’ साइन गरेका हुन् ।

यो फिल्मको बिहीबार लतिपुरको बंगालमुखी मन्दिरमा शुभमुहूर्त भएको छ । स्क्रिप्ट पूजापछि निर्माण पक्षले फिल्मको पहिलो पोस्टर सार्वजनिक गरेको हो ।

पोस्टरमा विराजलाई फिचर्ड गरिएको छ । क्रोधित मुद्रामा रहेका उनको शरीर रगतले लतपतिएको छ । उनले देब्रे खुट्टाले एक व्यक्तिको लास कुल्चिएका छन् । उनको वरवर केही व्यक्तिहरु ढलेका छन् । केहीलाई झुण्डाइएको छ ।

अर्थात्, फिल्ममा एक्सन खुराकहरु भरिपूर्ण रहेको पोस्टरले संकेत गरेको छ ।

यही पोस्टरमार्फत् निर्माण पक्षले फिल्मको प्रदर्शन मिति घोषणा गरेको हो । पोस्टरमा प्रदर्शन मिति चैत २७ लाई तोकिएको छ ।

फिल्ममा ‘राम नाम सत्य’मा विराजसहित सुशिल श्रेष्ठ, आयुष सिंह ठकुरी, सुपुष्पा भट्ट, दिव्या रायमाझी र अर्पण थापा मुख्य भूमिकामा रहेको बताइएको छ ।

माइकल इन्टरटेन्मेन्ट हाउसको ब्यानरमा बन्ने यो फिल्मका लेखक तथा निर्देशक माइकल चन्द हुन् ।