काठमाडौं- मोहीको नाममा जग्गाको पुर्जा बनाइदिने भन्दै घुस मागेको उजुरी परेपछि अख्तियार दुरुपयोग अनुसन्धान आयोगको टोली टंगालबार मंगलबार दिउँसो भक्तपुरको च्यामासिङस्थित भूमि सुधार तथा मालपोत कार्यालयमा स्टिङ अपरेशनका लागि छिर्‍यो ।

उजुरी परिसकेकाले सेवाग्राहीले घुसवापद् दिने ठूलो परिमाणको रकमको विवरणसमेत लिएर स्टिङ अपरेशनका लागि पुगेको अख्तियारको टोलीले भक्तपुर मालपोत कार्यालयमा प्रमुख कुमार आचार्यलाई नै पक्राउ गर्न सफल भयो ।

उनीसहित उक्त मालपोतमा कार्यरत तीनजना कर्मचारीलाई २४ लाख ५० हजार रुपैयाँ घुससहित रंगेहात नियन्त्रणमा लिइएको अख्तियारका प्रवक्ता राजेन्द्र पौडेलले बताएका छन् ।

अख्तियारका प्रवक्ता पौडेलले मंगलबार जारी गरेको विज्ञप्ति अनुसार चाँगुनारायण नगरपालिका क्षेत्रमा रहेको १४ रोपनी ४ आना जग्गालाई मोहीको नाममा पुर्जा बनाउने प्रयोजनका लागि उक्त रकम घुसस्वरुप मागिएको थियो ।

ठूलो परिमाणको रकम घुस मागिएपछि सेवाग्राहीको उजुरीका आधारमा अख्तियारको अनुसन्धान टोली स्टिङ अपरेशन गर्न खटिएको पौडेलले बताए ।

अख्तियारको टोली स्टिङ अपरेशनका लागि भूमिगत रुपमा खटिइसकेको अवस्थामा उक्त घुसवापदको रकम कार्यालय सहयोगी टीकाराम राउतले बुझिसकेको अवस्थामा समातिए ।

उनीसँगै घुसको डिल गरेका कार्यालय प्रमुख कुमार आचार्य र भूमिसुधार शाखाका नायब सुब्बा दीपक प्रसाद अधिकारी पनि पक्राउ परेका छन् । उनीहरूको साथबाट बरामद भएको २४ लाख ५० हजार रुपैयाँसहित तीनैजनालाई टंगाल हिरासतमा हाजिर गराइएको छ ।

तीनैजनामध्ये आचार्यको साथबाट दुई थान मोबाइल फोन र नायब सुब्बा अधिकारीको साथबाट एक थान मोबाइल फोन पनि अख्तिायरले बरामद गरेर ल्याएको छ ।