काठमाडौं-पूर्वराष्ट्रपति विद्यादेवी भण्डारीले नेकपा एमालेमा आफ्नो भूमिकाका बारे केन्द्रीय कमिटीले निर्णय गर्ने बताएकी छन् ।

जननेता मदन भण्डारीको ७५ औं जन्मजयन्तीका मनाउने सन्दर्भमा मदन भण्डारी फाउण्डेशनले मंगलबार काठमाडौंमा आयोजना गरेको पत्रकार सम्मेलनमा उनले एमालेको राजनीतिमा सक्रिय भएर आफूले देशको सेवा गर्ने बताइन्।

तर आफ्नो भूमिकाबारे एमाले केन्द्रीय कमिटीले निर्णय गर्ने पनि उनले बताएकी छन् । महाधिवेशनअघि केन्द्रीय कमिटी नै माथिल्लो निकाय भएकाले एमालेमा आफ्नो कुन संरचनामा के भूमिका हुने माथिल्लो तहको नेतृत्वले निर्णय गर्ने उनले बताइन् ।

त्यस्तै भण्डारीले विधान महाधिवेशनमा सन्दर्भमा दशौँ महाधिवेशनका प्रतिनिधिले नै भाग लिने भए पनि नयाँ सदस्यसमेत थपिएकाले यसबारे पनि पार्टी केन्द्रीय कमिटीले नै निर्णय लिने उल्लेख गरिन् ।

पूर्वराष्ट्रपति भण्डारीले संसद विघटनको घटनाले आफूलाई पछ्याइरहनेबारे आफू जानकार रहेको पनि बताएकी छन् ।

भण्डारीले कसैको कुनै प्रेसर र दबाबभन्दा कार्यकारी अधिकारप्राप्त मन्त्रिपरिषद्‍का निर्णयलाई आफूले कार्यान्वयन मात्रै गरेको दाबी गरेकी हुन्।

‘संसद् विघटनको कुराले मलाई पछ्याइरहन्छ। ०१७ सालको कुरा पनि आइरहन्छ। त्यसपछि आएर ०५१ सालको आइरहन्छ। त्यस्तै म राष्ट्रपति हुँदा दुईपटक संसद् विघटन भएका छन्’, उनले भनिन्, ‘कसैको कुनै प्रेसर र दबाबभन्दा मन्त्रिपरिषद्को निर्णय कार्यान्वयन मात्रै गरेकी थिएँ। जे व्यवस्था छ, त्यहीअुनसार गरेँ। त्यो दबाबको विषय थिएन, विधि र व्यस्थाअनुसार मन्त्रिपरिषद्को निर्णय कार्यान्वयन गरेकी थिएँ ।’

भण्डारी राष्ट्रपति भएका बेला प्रधानमन्त्रीको हैसियतमा केपी शर्मा ओलीले दुईपटक संसद् विघटन सिफारिस गरेका थिए। २०७७ पुस ५ गते र ०७८ जेठ ७ गते प्रधानमन्त्री ओलीले गरेको विघटनको सिफारिसलाई भण्डारीले कार्यान्वयन गरेकी थिइन्। तर दुवै पटकको संसद् विघटनलाई सर्वोच्च अदालतले खारेज गरिदिएको थियो ।

उनले यसबारेमा खुलेरै कुरा गर्दै पत्रकारहरूलाई दृष्टान्त सुनाइन् । ‘तपाईंहरू छलफलमा भाग लिन चाहनुहुन्छ भने त्यसको राजनीतिक, संवैधानिक पाटो, इतिहासका कुरा छन्, देशलाई के गर्दा निकास दिनुपर्थ्यो, कुन बेला के काम गर्नुपर्छ ? त्यो कुरा छलफलको विषय हुनसक्छ’, उनले भनिन्, ‘यसमा दबाबको कुरा थिएन । मैले संवैधानिक विधि, व्यवस्थाअनुसार मन्त्रिपरिषद्बाट आएको कुरालाई कार्यान्वयन गरेको जानकारी गराउन चाहन्छु ।’

मदन भण्डारी फाउण्डेशनले मदन भण्डारीको जन्मजयन्ती मनाउन पूर्वराष्ट्रपति भण्डारीको संरक्षकत्वमा बागमती प्रदेशका पूर्वमुख्यमन्त्री डोरमणि पौडेलको संयोजकत्वमा मूल व्यवस्थापन समिति गठन पनि गरेको छ ।

विचार गोष्ठी, वादविवाद, हाजिरी जवाफ, खेलकुद प्रतियोगिता लगाएतका रचनात्मक क्रियाकपालसहित मदन भण्डारीको जन्मजयन्तीलाई २०८२ र २०८३ सालभर मनाइने फाउण्डेशनले जनाएको छ ।