काठमाडौं– नेकपा एमालेका सांसद पदम गिरीले सरकारले गरेका राम्रा कामलाई देख्न नसक्नेहरूले सरकारमाथि भ्रम छर्न खोजेको बताएका छन् ।  

मंगलबार प्रतिनिधिसभा बैठकमा बोल्दै सांसद गिरीले विकास निर्माणका सवालमा सरकारले गरेका राम्रा कामलाई चुनौती दिन नसकेपछि प्रधानमन्त्रीको स्पेन भ्रमणलाई देखाएर भ्रम छर्न खोजेको बताएका हुन् । 

उनले प्रधानमन्त्रीसँग स्पेन गरेका सबै सदस्यहरूले स्वदेश फकिएको उल्लेख गर्दै अघिपछि विभिन्न विमानमार्फत गएका व्यक्तिहरूको जिम्मा सरकारले लिन नसक्ने तर्क गरे ।

त्यस्तै सांसद गिरीले वर्तमान सरकारको १ वर्षमा बिग्रिएको अर्थतन्त्रलाई सही दिशामा ल्याउने काम भएको दाबी गरे । विगतको सरकारले भन्दा अहिलेको सरकार आएपछि राजस्व संकलनमा वृद्धि भएको, आर्थिक वृद्धिमा सुधार भएको, मुद्रा सञ्चितिको अवस्थामा सुधार आएको उनले बताए । 

उनले आर्थिक क्षेत्रमा निकै सुधार भए पनि पर्याप्त नभएकाले सबै मिलेर मुलुकको विकास र समृद्धिमा बहस गर्न जरुरी रहेको धारणा राखे ।