काठमाडौं– स्वतन्त्र ऊर्जा उत्पादकहरूको संस्था नेपाल (इप्पान)को २३औँ वार्षिक साधारण सभामा ऊर्जा, जलस्रोत तथा सिँचाइमन्त्री दीपक खड्का र पूर्व उर्जा मन्त्री जनार्दन शर्माबीच दोहोरी चलेको छ । 

शर्माले सरकारको नियत र कार्यशैलीमाथि प्रश्न उठाउँदै समयमै विद्युत खरिद सम्झौता नगरेको, लाइसेन्स कब्जा गर्ने प्रवृत्ति रोक्न नसकेको भन्दै सरकारको आलोचना गरेका थिए । 

शर्माले कार्यक्रममा बोल्दै उर्जा मन्त्री खड्कालाई मोबाइल नचलाई आफ्नो कुरा सुन्नका लागि मञ्चबाटै भनेका थिए । शर्मा पछि मन्तव्य दिएका मन्त्री खड्काले काउन्टर जवाफ फर्काए । मन्त्रीले खड्काले विगत १२ वर्षमा माओवादी नेतृत्वले ऊर्जा मन्त्रालय सम्हाल्दा के काम भयो ? भन्दै प्रश्न गरे । 

‘विगतदेखि रोकिएका काम अहिले अघि बढेका छन्,’ उनले भने, ‘सरकारमा हुँदा एउटा कुरा र बाहिर हुँदा अर्को कुरा गरेर विकासको बाधक बन्नुको सट्टा राष्ट्रको समृद्धिका लागि सबैले अपनत्व लिनुपर्छ ।’

खड्काले ऊर्जा क्षेत्रलाई दिगो विकासको बाटोमा अघि बढाउन सरकार दृढतापूर्वक लागिपरेको बताए । उनले आगामी १० वर्षमा २८ हजार ५०० मेगावाट विद्युत उत्पादन गर्ने लक्ष्यसहितको कार्ययोजना अनुसार काम अघि बढिसकेको बताए। 

‘ट्रान्समिसन लाइन पुगेको ठाउँमा विद्युत उत्पादन गर्न दिनुपर्ने प्रधानमन्त्रीज्यूको नीति अनुरूप पीपीए भएको छ,’ खड्काले भने । 

उत्पादनका क्रममा देखिएका अवरोध हटाउन वन मन्त्रालयसँग पनि निरन्तर छलफल र समन्वय भइरहेको उनले जानकारी दिए ।

ऊर्जा क्षेत्रमा निजी क्षेत्रको भूमिका महत्वपूर्ण रहेको भन्दै मन्त्री खड्काले सरकारले सुरक्षित लगानी वातावरण तयार गरेर निजी क्षेत्रलाई साझेदार बनाउन कुनै द्विविधा नरहेको बताए ।

मन्त्री खड्काले मुलुकको समृद्धिका लागि ऊर्जा क्षेत्रमा पूँजी निर्माण र चलायमान बनाउनुपर्ने आवश्यकता औंल्याए । साना र मझौला जलविद्युत् आयोजनाको महत्त्वलाई स्वीकार्दै, सोलारसहित मिक्स इनर्जीमा पनि लगानीको वातावरण तयार गर्न सरकार गम्भीर रहेको उनको भनाइ थियो ।

सरकारले समयानुकूल कानुन परिमार्जन गरेर ऊर्जा विकासलाई थप गति दिने स्पष्ट पारेका थिए ।