काठमाडौं- नागरिक उन्मुक्ति पार्टीकी अध्यक्ष रञ्जिता श्रेष्ठले मंगलबार मात्रै राजीनामा दिएका संघीय मामिला तथा सामान्य प्रशासन मन्त्री राजकुमार गुप्ता र बिचौलियासँग आफ्नो नाम घुस प्रकरणमा जोडेर बदनाम गर्न खोजिएको गुनासो गरेकी छन् ।

पूर्वभूमि व्यवस्था, सहकारी तथा गरिबी निवारण मन्त्री श्रेष्ठले यही आइतबार आफूलाई समेत जोडेर घुस प्रकरणमाबारे सञ्चारमाध्यममा प्रकाशित भएको समाचारलाई लिएर यस्तो गुनासो गरेकी हुन् ।

‘म र मेरो पार्टीसँग सम्बन्धित नभएको भूमिसम्बन्धी आयोगको नियुक्ति र कर्मचारी सरुवाको विषयलाई लिएर नितान्त व्यक्तिलक्षित शीर्षक राखेर समाचार प्रसारण गरिनु म र मेरो पार्टीलाई बदनाम गराउन, आधारहीन आरोपित गरेर नियोजित चरित्रहत्या को प्रयास हो’, उनले भनेकी छन् ।

उनले नाउपा पारदर्शितमा विश्वास गर्ने पार्टी भएको पनि बताएकी छन् । ‘हाम्रो पार्टी पारदर्शिता, सुशासन र शून्य सहनशीलताको सिद्धान्तप्रति दृढ र प्रतिबद्ध छ’, उनले भनेकी छन्, ‘घटनाको सत्य तथ्य छानबिनका लागि कानुनी प्रक्रियामार्फत् अगाडि बढाउन आग्रह गर्दछौँ । तर अधिकार क्षेत्रबाहिरको विषयलाई जोडेर गलत तरिकाले असत्य समाचार सम्प्रेषण गरेकोमा खेद प्रकट गर्दछौँ।’

अध्यक्ष श्रेष्ठ र विचौलिया भनेका अर्का व्यक्तिले मन्त्री गुप्तासँग मिलेर ७८ लाख रुपैयाँको घुस डिल गरेको समाचार केही दिनयता भाइरल भएको छ । यही विवादमा मन्त्री गुप्ताले मंगलबार राजीनामा पनि दिइसकेका छन् ।