काभ्रेपलाञ्चोक- गत वर्ष असोज १०-१२ गते काभ्रेपलाञ्चकोकको रोशी खोलामा आएको बाढीले तहसनहस पारेको बस्ती बचाउने प्रयास भइरहेको छ ।

अहिले पनि उत्तिकै जोखिममा रहेको खोला किनारको उक्त बस्तीका बासिन्दा बर्खा लागेसँगै त्रसित छन् ।

रोशी किनारको बस्ती जोगाउन स्थानीय सरकारले अहिले धमाधम तटबन्ध बनाइरहेको छ । पनौती नगरपालिका-१२ मा पर्ने यो क्षेत्रमा जोखिम न्यूनीकरण गर्न वडास्तरबाट तटबन्ध बनाउने काम भइरहेको छ ।

पनौती नगरपालिका-१२ का वडाध्यक्ष जयराम केसी (खत्री) का अनुसार खोलाको बहाव नियन्त्रण र आसपासका बस्ती सुरक्षित गर्न खोलो गहिरो बनाएर तटबन्ध बनाइएको हो ।

सुरूमा डिजिटल नक्साबाट खोलाको सीमा छुट्याएर बढी जोखिमयुक्त स्थानलाई प्राथमिकता दिई तटबन्ध बनाउने काम भइरहेको उनले बताए ।

तटबन्ध निर्माणका लागि एक करोड ८० लाख रूपैयाँ बजेट छुट्याइएको छ । आगामी वर्षको बजेटमा रोशी करिडोरको काम सुरू हुने छ । यसका लागि ५ करोड बजेट राखिएको उनले बताए ।

तस्बिरहरू : नेपाल फोटो लाइब्रेरी