काठमाडौं- बिहीबार साँझ संघीय राजधानी काठमाडौंसहित देशका पूर्वी र मध्यभागका अधिकांश स्थानमा बिजुली गएको छ।

खाना पकाउने समयमा बिजुली जाँदा काठमाडौं उपत्यकासहित देशका धेरैजसो भाग अन्धकार भएका छन् ।

नेपाल विद्युत् प्राधिकरणको ढल्केबर सब-स्टेसन प्राविधिक समस्या आउँदा देशभर अघोषित लोडसेडिङको अवस्था आएको हो ।

प्राधिकरणका प्रवक्ता राजाभाइ शिल्पकारले ढल्केबर सब-स्टेशनमा प्राविधिक समस्या देखिँदा काठमाडौं उपत्यकासहित देशका मध्य र पूर्वीभागमा बत्ती गएको बताएका छन् ।

उनका अनुसार भारतबाट आउने लाइनमा फल्ट हुँदा बिजुली गएको हो । ‘भारतबाट बेलुका त बिजुली आउँदैन । दिउँसो मात्रै आउने भए पनि फल्ट हुँदा समस्या भएको हो’, उनले भने, ‘बिजुली नआए पनि फ्रिक्वेन्सी मिलाउनुपर्ने हुन्छ । अहिले फल्ट भेटिएको स्थानमा मर्मत भइरहेको छ । केही बेरमा बिजुली आउँछ ।’