काठमाडौं– संघीय लोकतान्त्रिक मोर्चाले आगामी आर्थिक वर्षको बजेटमा जनसङ्ख्या र मानव विकास सूचकांकको आधारमा रकम विनियोजनको माग गरेको छ । मोर्चाको बिहीबार बसेको बैठकले मधेश-तराई र पिछडिएको क्षेत्रमा जनसङ्ख्या र मानव विकास सूचकांकको आधारमा बजेट विनियोजन गर्नुपर्ने माग गरेको हो ।  

मोर्चा घटक लोकतान्त्रिक समाजवादी पार्टी (लोसपा)को केन्द्रीय कार्यालय बबरमहलमा बसेको बैठकले बजेट विनियोजनका लागि सरकारसँग माग गर्ने निर्णय गरेको राष्ट्रिय मुक्ति पार्टी, नेपालका नेता केशव झाले जानकारी दिए । 

उनले संविधान संशोधन, भूमीसम्बन्धी विधेयक, बन्दी रिहाई, मोर्चाको कार्यविधि र मोर्चाले आगामी दिनमा गर्ने कार्यक्रमहरूबारे खाका बनाएर अर्को बैठकमा पेस गर्न सचिवालयलाई निर्देशन पनि दिएको छ । 

बैठकमा लोसपाका अध्यक्ष महन्थ ठाकुर, जसपाका अध्यक्ष उपेन्द्र यादव, जनमत पार्टीका अध्यक्ष डा. सीके राउत, जनता प्रगतिशील पार्टीका अध्यक्ष हृदयेश त्रिपाठी, तमलोपाका अध्यक्ष वृषेशचन्द्र लालको उपस्थिति रहेको थियो । 

यस्तै बैठकमा मोर्चामा आवद्ध विभिन्न दलका नेताहरू रामनरेश राय, लालबीर चौधरी, केशव झा, शिवजी राय, शर्वेन्द्रनाथ शुक्ल, अब्दुल खान, अनिल महासेठ, सन्तोष मेहता, मनिष सुमन, ब्रजकिशोर सिंह, ज्ञानेन्द्र झा, रामकुमार शर्मा पनि उपस्थित थिए ।