काठमाडौं – वि.सं २०८१ फिल्म यात्रा नायक पल शाहका लागि सुखद रहेन । उनको अभिनय रहेको तीन फिल्म प्रदर्शनमा आए– ‘पुजार सार्की’, ‘रावायण’ र ‘मायावी’ ।

यीमध्ये फिल्म ‘पुजार सार्की’ हिट बन्यो । तर, पल शाह यस फिल्मको केन्द्रीय भूमिकामा थिएनन् । मल्टिस्टारर यस फिल्ममा नायक प्रदीप खड्का हाबी थिए । फिल्मको कथा प्रदीपलाई केन्द्र भागमा राखेर अगाडि बढेको छ ।

अर्थात्, ‘पुजार सार्की’ हिट हुनुको जस नायकका रुपमा पलले मात्र लिन पाउँदैनन् । यसको जस प्रदीप र आर्यन सिग्देललाई बढी जान्छ ।

उनको गत वर्षको दोस्रो फिल्म ‘रावायण’ फ्लप भयो । पलले चरित्र निर्माण गर्न नसकेको भन्दै चर्को आलोचना समेत भयो । उनले चरित्र निर्माणमा राखेको नक्कली दाह्री अस्वभाविक देखिएको थियो । यसले गर्दा दर्शक उनीसँग निराश बनेका थिए ।

चलचित्र विकास बोर्डका अनुसार यो फिल्मको ग्रस कलेक्सन डेढ करोड हाराहारी मात्रै छ ।

पलको अर्को फिल्म ‘मायावी’को व्यापार पनि निराशजनक छ । यो फिल्मले करिब ७२ लाखको मात्रै व्यापार गरेको छ ।

‘मायावी’ले दर्शक र समीक्षक दुवैबाट सकारात्मक प्रतिक्रिया पाउन सकेन । फलतः फिल्म बक्स अफिसमा फ्लप बन्यो ।

यी तीन फिल्मलाई हेर्दा ०८१ पलको लागि सुखद मान्न सकिन्न । सोहीकारण होला पलले ०८२ मा नयाँ थलानी गर्ने घोषणा गरेका छन् । यो वर्ष भने उनले आफ्नो नायकको परिचयलाई निर्माताको रुपमा विस्तार गर्ने भएका छन् ।

नयाँ वर्षको अवसर पारेर पलले फिल्म ‘यानीमाया’ निर्माणको घोषण गरेका हुन् । यो फिल्म ‘पल शाह फिल्मस्को ब्यानरमा बन्ने भएको हो ।

यो फिल्म पलको डेब्यू निर्माण हो । यसैबाट फिल्म लेखक विकास सुबेदीले निर्देशनमा डेब्यू गर्दैछन् । विकासले ‘प्रकाश’, ‘पुजार सार्की’ र ‘महाभोज’ लेखेका छन् ।

‘यानीमाया’को लेखक पनि विकास आफैँ हुन् । उनका अनुसार यो फिल्म फ्यामिली ड्रामा कथामा आधारित छ ।

यस फिल्मको छायाङ्कन असारबाट हुने बताइएको छ । कलाकार चयनको काम भने बाँकी रहेको बुझिएको छ ।