काठमाडौं– बेलायती प्रधानमन्त्री किर स्टार्मरले गत आर्थिक वर्ष तिरेको करको विवरण सार्वजनिक भएको छ । गत वर्ष उनले ५४ हजार पाउण्डभन्दा धेरै कर तिरेका छन् ।

बेलायत सरकारले जारी गरेको प्रतिवेदनअनुसार आर्थिक वर्ष सन् २०२३–२४ मा प्रधानमन्त्री स्टार्मरले ५४ हजार ७ सय १८ पाउण्ड कर तिरेका हुन् । उनी सो अवधिमा बेलायतको विपक्षी दलको नेताका रुपमा रहेका थिए ।

उनी गत वर्षको जुलाइ महिनामा मात्रै प्रधानमन्त्री नियुक्त भएका थिए । उनले सो अवधिमा कुल १ लाख ५२ हजार २ सय २५ पाउण्ड कमाइ गरेका थिए ।

यसमध्ये अधिकांश रकम संसद सदस्यले पाउने तलबका रुपमा उनले कमाइ गरेको बीबीसीले जनाएको छ । त्यसैगरी, थोरै रकम किताबको रोयल्टी र ५ हजार १ सय ७४ पाउण्ड उनले बचत खाताबाट ब्याज प्राप्त गरेका थिए ।