काठमाडौं- नेपाली कांग्रेसका सभापति शेरबहादुर देउवाले केन्द्रीय कार्य समिति बैठक बोलाएका छन् ।

आगामी वैशाख १७ गते बुधबाट केन्द्रीय कार्यालय सानेपामा बस्नेगरी देउवाले केन्द्रीय कार्यसमिति बैठक बोलाएका हुन् ।

मुख्यसचिव कृष्णप्रसाद पौडेलले मंगलबार एक सूचना निकालेर बैठकका लागि केन्द्रीय कार्यसमितिका पदाधिकारी, सदस्य र आमन्त्रित सदस्यलाई उपस्थितिका लागि आह्वान गरेका छन् ।

पछिल्लो समय नेकपा एमाले नेतृत्वको गठबन्धन सरकारलाई लिएर कांग्रेसमा आक्रोश बढिरहेको छ । सरकार कछुवाको गतिमा चलिरहेको भन्दै नेता डा. शेखर कोइराला र महामन्त्री गगनकुमार थापासहितले तीव्र आलोचना गरिरहेका छन् ।

नेताहरूको आलोचनाबीच सभापति देउवाले मंगलबार प्रधानमन्त्री केपी शर्मा ओलीलाई भेटेका थिए । अबको चानचुन एक वर्षपछि देउवा यही समीकरणबाट प्रधानमन्त्री बन्ने तर्खरमा छन् ।

उता प्रमुख प्रतिपक्षी नेकपा माओवादी केन्द्रले पनि यो सरकार फेल भइसकेको भन्दै कांग्रेस नेतृत्वमा सरकार बनाउनुपर्ने मत राखिरहेको छ ।

अध्यक्ष पुष्पकमल दाहाल प्रचण्डले सरकार फेरबदल हुन सक्ने बताइरहेका बेला कांग्रेसको केन्द्रीय कार्यसमिति बैठक डाकिएको हो । यो बैठकमा कांग्रेसले सरकारका काम र एमालेसँगको सहकार्यको पनि औपचारिक रुपमा समीक्षा गर्नेछ ।