दोलखा- जिल्लाको सुन्दर धार्मिक तथा  पर्यटकीय स्थल शैलुङ नव वर्ष २०८२ सालको पहिलो दिन आन्तरिक तथा बाह्र पर्यटनले भरिएको थियो । वैशाख १ गते सैलुङ क्षेत्रमा रहेका डाँडाकाडा आन्तरिक तथा बाह्र पर्यटकले भरिएका थिए ।

सोमबार शैलुङ पुग्ने पर्यटकका सवारीले कालापानी क्षेत्र देखिनै भक्तजन र पर्यटकको बाक्लो भिडभाड देखिन्थ्यो । शैलुङ गाउँपालिकास्थित प्रसिद्ध पर्यटकीय स्थल शैलुङ डाँडा ।

समुद्री सतहदेखि ३ हजार ३ सय मिटर उचाई एक सय भन्दा बढी थुम्काहरू मिलेर बनेको खुल्ला क्षेत्र हो । यहाँ आउने आन्तरिक पर्यटकको संख्या पछिल्ला दिनहरूमा बढ्दै गएको शैलुङ पर्यटन प्रवर्द्धनमा नजिकबाट चासो दिइरहेका स्थानीय प्रविन थपलियाले बताए ।

छिनछिनमा रूप फेरि रहने शैलुङ हेर्न विशेषगरी दोलखा रामेछाप र सिन्धुपाल्चोक तथा काठमाडौंका आन्तरिक पर्यटक नै धेरै भेटिन्थे । कालापानी देखि करिब ३०/३५ मिटेनको उकालो चढे पछि देखिने यस क्षेत्रका ससाना थुम्कासँगै डाँडाकाँडा बाट देखिने सुन्दर मनमोहक दृश्यले यहाँ आउने जोकोहीलाई लोभ्याउने गर्छ।

चैत-वैशाखको गर्मी भुल्न पर्यटकको विशेष दिन नै वैशाख १ गते सोमबार बनेको देखियो । वर्षभरिको दुख- सुख भुल्न शैलुङ पुग्नेहरूलाई सोमबार मौसमले पनि मध्ये दिनसम्म खुल्ला रूपमै साथ दिएको थियो ।

तर दिउँसो ३-४ बजे पछि भने,शैलुङकाे मौसम परिवर्तन आएपछि बाक्लो वर्षाद भएको थियो।वर्षाले सैलुङ पुगेका पर्यटक आफ्नो गन्तव्य फर्किन अतालिइरहेका भेटिन्थे ।

कालापानी क्षेत्रको सडकमा  साना-ठुला सवारीको चापले आवतजावत गर्नै सकस थियो । नयाँ वर्षको अवसर पारेर सैलुङमा सोमबार दशौं हजार  पर्यटक सैलुङ पुगेको आकलन गरिएको छ । 

समुन्द्री सतहदेखि ३ हजार ३ सय मिटर उचाइमा अवस्थित दोलखाको शैलुङ डाँडा पछिल्लो समय आन्तरिक तथा बाह्र पर्यटनको रोजाइ पर्दै आएको छ । 

दोलखा र रामेछापको सिमानामा पर्ने शैलुङ डाँडा पहाडको टाकुरामा साना ठूला सय वटा थुम्का मिलेर बनेको छ । गाउँपालिकाले हाल कालापानीसम्म सडक निर्माण गरिसकेको छ भने कालापनीदेखि शैलुङडाँडाँसम्म पुग्न  पदमार्ग तथा पाँच सय मिटर लामो ग्रेटवाल निर्माण गरिएको छ ।

 पछिल्लो समय आन्तरिक पर्यटकको केन्द्रको रूपमा शैलुङ विकास हुँदै गएको छ । यातायातका माध्यमबाट शैलुङको वेसक्याम्प कालापानीसम्म पुगी ३५-४०मिनेटको पैदलयात्रामार्फ शैलुङ डाँडाको भ्रमण गर्न सकिन्छ ।

शैलुङका सबै थुम्कामा हिउँद महिनामा हिउँले सेताम्मे हुँदा र वैशाख १ गते नयाँ साल मनाउन पुग्नेहरूले यस क्षेत्रमा आन्तरिक तथा बाह्र पर्यटकहरूको भीड लाग्ने गर्छ ।

पछिल्लो समय सैलुङ पर्यटन प्रवर्द्धनमा यहाँका स्थानीय तथा व्यवसायीहरूले सैलुङ प्रचारप्रसारमा जोड दिएको पाइन्छ।सैलुङ प्राकृतिक पर्यटकीय स्थल सँगै पछिल्लो समय धार्मिक रूपमा पनि अब्बल बन्दै गएको छ। -सुबास बस्नेत/ दोलखा