काठमाडौं – चिनियाँ जनमुक्ति सेनाका कमाण्डरले कुनै पनि समय ताइवानविरुद्ध लड्न तयार रहेको बताएका छन् । पूर्वी थिएटर कमाण्डका प्रमुख लिन शियानयाङले कुनै पनि बेला ताइवानविरुद्ध लड्न चिनियाँ जनमुक्ति सेना सक्षम र तयार रहेको बताएका हुन् ।

पछिल्लो समय ताइवान र चीनबीच तनाव बढिरहेका बेला चिनियाँ कमाण्डरको यस्तो भनाइ आएको हो । खासगरी गत मे महिनामा विलियम लाई चिङ तेले ताइवानको राष्ट्रपतिको जिम्मेवारी सम्हालेयता सम्बन्धमा तिक्तता आएको छ ।

चिनियाँ गृहयुद्धपछि अलग भएको ताइवानमा लोकतन्त्रिक शासन व्यवस्था रहिआएको छ भने चीनमा कम्युनिष्ट पार्टी नेतृत्वको सरकार छ । चीनले राष्ट्रपति लाई चिङ तेलाई ‘खतरनाक पृथकतावादी’ को संज्ञा दिँदै यसबाट थप उत्तेजना पैदा हुने चेतावनी दिने गरेको छ ।

चीनले लामो समयदेखि ताइवानलाई मुख्यभूमि मातहत ल्याउने बताउँदै आएको छ । यसका लागि आवश्यक परे बल प्रयोग गर्ने चिनियाँ नीति छ ।