काठमाडौं – भारतमा उच्च सम्पत्ति भएका धनाढ्य व्यक्तिहरुको संख्यामा उच्च वृद्धि हुने प्रक्षेपण गरिएको छ । सन् २०२८ सम्म ‘हाई नेट वर्थ इन्डिभिजुल’ को संख्यामा ९।४ प्रतिशतले वृद्धि हुने अन्तर्राष्ट्रिय वित्तीय सेवा प्रदायक संस्था नाइट फ्रांकले जनाएको छ ।

यससँगै सन् २०२८ सम्म भारतमा यस्ता व्यक्तिहरुको संख्या ९३ हजार ७ सय ५३ जना रहने उक्त संस्थाको प्रतिवेदनमा उल्लेख छ । सन् २०२५ मा भारतमा यस्ता व्यक्तिको संख्या ८५ हजार ६ सय ९८ जना रहेको नाइट फ्रांकको वेल्थ रिपोर्टमा उल्लेख छ ।

भारतीय समाचार संस्था एएनआईका अनुसार कुल सम्पत्ति १ करोड अमेरिकी डलरभन्दा धेरै हुनेलाई ‘हाई नेट वर्थ इन्डिभिजुल’ को सूचीमा राख्ने गरिएको छ । हाल भारतमा विश्वका धनाढ्यहरुमध्ये ३।७ प्रतिशतको बसोबास रहेको छ ।

हाल सबैभन्दा धेरै अमेरिकामा ९ लाख ५ हजार ४ सय १३ जना धनाढ्यहरुको बसोबास छ । त्यसपछि चीनमा ४ लाख ७१ हजार ६ सय ३४ जना र जापानमा १ लाख २२ हजार १ सय १९ जना धनाढ्यहरुको बसोबास रहेको छ ।