काठमाडौं – कास्कीमा ‘पोखरा भ्रमण वर्ष २०२५’ उद्घाटन क्रममा चरम लापरवाही गर्दा जलन खेपेका उपप्रधान तथा अर्थमन्त्री विष्णुप्रसाद पौडेल र पोखरा महानगरका मेयर धनराज आचार्यको शरीर ६ प्रतिशतसम्म जलेको छ ।

मन्त्री र मेयरद्वयको उपचार गरिरहेको कीर्तिपुर अस्पतालले शनिबार साँझ प्रेस विज्ञप्ति जारी गर्दै उनीहरूको अनुहारमा जलन भएकाले स्वासनली र फोक्सोमा असर पर्ने सम्भावना रहेको पनि जानकारी दिएको छ ।

पौडेल र आचार्यलाई अस्पतालले हाल सघन उपचार कक्षमा राखेर उपचार सेवा दिइरहेको छ । उनीहरूको उपचारमा प्रा.डा‍. बीडी झा, डा. प्रवीण गिरी, प्रा.डा. शङ्करमान राई, डा. विशाल कार्की, डा. मनिष यादव, डा. प्रयुष अर्याल, रिना गौतम, तृष्णा महर्जन र निर्मला कुँवर लगायतको चिकित्सक टोली खटिएको छ ।

अति प्रज्वलनशील हाइड्रोजन ग्यास भरिएको बेलुनको झुप्पोमा भ्रमण वर्षको लोगो झुण्ड्याएर आकाशतिर उडाउन लाग्दा मन्त्री पौडेल र मेयर आचार्य जलनमा परेका थिए । स्पार्क मेसिनले फालिरहेको आगोको झिल्कोमाथि नचाउँदा बेलुन बिस्फोट भएको थियो । बेलुनको तीव्र गतिको ज्वाला मन्त्री पौडेल र मेयर आचार्यको अनुहारमै परेको थियो ।

यो पनि –

उद्घाटन र घोषणा मोह : चरम लापरबाही गर्दा दुर्घटनामा परे मन्त्री र मेयर (तस्बिरहरू)

उनीहरू दुबैलाई पोखरामा प्राथमिक उपचार गराइ थप उपचार निम्ति हेलिकोप्टरबाट काठमाडौं ल्याइएको हो । कीर्तिपुरस्थित बर्न अस्पतालमा हाल दुबैको उपचार भइरहेको छ ।