लुम्बिनी– जिल्ला प्रहरी कार्यालय रूपन्देहीले ठूलो परिणामको  गाँजा र चरेससहित सातजनालाई पक्राउ गरेको छ ।

जिल्ला प्रहरी कार्यालय रूपन्देही र लागूऔषध नियन्त्रण ब्युरो भैरहवाबाट खटिएको संयुक्त टोलीले २० किलोग्राम चरेस र २१ किलोग्राम गाँजासहित त्यसमा संलग्न सात जनालाई पक्राउ गरेको हो ।

प्रहरीले रूपन्देही सिद्धार्थनगर नगरपालिका वडा नम्बर ४, वडा नम्बर ८ र तिलोत्तमा नगरपालिका वडा नम्बर १५ मा लागूऔषध कारोबार हुँदै गरेको भन्ने गोप्य सूचनाका आधारमा लागूऔषध र कारोबारमा संलग्नलाई पक्राउ गरिएको रूपन्देही प्रहरी प्रमुख रञ्जितसिंह राठोरले जानकारी दिए ।

प्रहरीले धादिङ गजुरी गाउँपालिका वडा नम्बर ८ का ३३ वर्षीय दीपक तामाङ, सोही स्थानका ३६ वर्षीय सुनबहादुर तामाङ, ३१ वर्षीय नक्कलबहादुर तामाङ, ४१ वर्षीय प्रेमलाल तामाङलाई पक्राउ गरेको छ ।

त्यसैगरी रूपन्देही सिद्धार्थनगर नगरपालिका वडा नम्बर ४ आदर्शनगरका २५ वर्षीय जीवन मल्लाह, तिलोत्तमा नगरपालिका वडा नम्बर १४ का २३ वर्षीय दीलिप केवट र स्याङ्जा गल्याङ नगरपालिका वडा नम्बर १ का ३८ वर्षीय जीवनाथ पाण्डे रहेका छन् । प्रहरीले लागूऔषध कारोबारमा संलग्न उनीहरूको थप अनुसन्धान भइरहेको जनाएको छ ।