काठमाडौं– राष्ट्रिय स्वतन्त्र पार्टी (रास्वपा)ले काठमाडौं जिल्ला अदालत परिसरमा वरिष्ठ अधिवक्ता दिनेश त्रिपाठीमाथि भएको कुटपिटप्रति अनुशासन विभागको ध्यानाकर्षण भएको जनाएको छ । 

सहकारी पीडितहरूका तर्फबाट बहस गरेर बाहिरिने क्रममा अधिवक्ता त्रिपाठीमाथि रास्वपाका कार्यकर्ताले कुटपिट गरेपछि पार्टीले घटनाप्रति अनुशासन विभागको ध्यानाकर्षण भएको बताएको हो । 

रास्वपाका कार्यवाहक प्रवक्ता मनिष झाले विज्ञप्ति जारी गरेर भनेका छन्, ‘यस विषयमा राष्ट्रिय स्वतन्त्र पार्टीको सम्बन्धित अनुशासन विभागको ध्यानाकर्षण भएको छ र सो घटनामा यदि दलको कुनै पनि सदस्यको संलग्नता भेटिएमा आवश्यक कारबाही हुनेछ ।’ 

उनले यस किसिमको व्यवहार कानूनी शासन, सुदृढ राजनीतिक अभ्यास र न्यायप्रति विश्वास राख्ने राजनीतिक दलका लागि स्वीकार्य नभएको पनि उल्लेख गरेका छन् ।