काठमाडौं- नेकपा एमाले अध्यक्ष केपी शर्मा ओलीले सचिवालय बैठकले अस्वीकार गरेको प्रस्ताव अन्ततः केन्द्रीय कमिटी बैठकमार्फत् बहुमतको आधारमा पारित गराएका छन् ।

शनिबार राति आफूनिकट नेताहरूसँग गुन्डुमा लामो छलफल हुँदा पनि उपाध्यक्ष र सचिवका आकांक्षीको व्यवस्थापनमा सहमति नजुटेपछि ओलीले दोस्रो विधान महाधिवेशनको तीन महिनामै नेतृत्व संरचनाको संख्या फेरबदल गर्ने निर्णय केन्द्रीय कमिटीबाट गराएका हुन् ।

गुन्डु बैठकमा सहमति जुट्न नसकेपछि ओलीले केन्द्रीय कमिटीमा बहुमतको आड लिँदै प्रस्ताव पेलेर पास गराएको नेताहरूको भनाइ छ ।

यसै विषयमा एमाले उपाध्यक्ष सुरेन्द्र पाण्डेले सामाजिक सञ्जालमार्फत असन्तुष्टि जनाएका छन् । उनले विधान र प्रक्रियालाई बेवास्ता गर्दै गरिएको निर्णयलाई ‘मनपरी’ भनेका छन् ।

पाण्डेले लेखेका छन्, ‘के हाम्रा विधानहरू अस्थायी हुन् र? हिजो विधान अधिवेशनअगाडि संख्या घटाऔँ भन्ने, अनि आज फेरि कोटाका नाममा त्यही संख्या बढाऔँ भन्ने– यो सरासर मनपरी होइन भने के हो? अहिले आएर दाँया–बाँया गर्ने हो भने विधान अधिवेशनको औचित्य नै समाप्त हुन्छ।’

उनले पार्टी विधान, विधि र प्रक्रिया अनुसार चल्नु अनिवार्य रहेको भन्दै मनपरीतन्त्रको विरोधमा संघर्ष जारी रहने पनि उल्लेख गरेका छन् ।