काठमाडौं- बंगलादेशको चटगाउँ बन्दरगाहमा २५ टन प्रतिबन्धित अफिमको बियाँ फेला परेको छ । भन्सार अधिकारीहरुले पाकिस्तानबाट आएको जहाजबाट उक्त परिमाणको अफिमको बियाँ बरामद गरेका हुन् ।

उक्त बन्दरगाहमा पाकिस्तानबाट ३२ टन सामान आएको थियो । तर, पछि खानतलासी गर्दा २५ टन अफिमको बियाँ फेला परेको द बिजनेस स्ट्याण्डर्डले उल्लेख गरेको छ । भन्सार प्रशासनले जारी गरेको प्रेस विज्ञप्तिमा विशेष सूचनाको आधारमा भन्सार प्रशासनको लेखा, अनुसन्धान तथा शोध (एआईआर) विभागले अफिम बरामद गरेको जनाइएको छ ।

चटगाउँस्थित कोटवाली क्षेत्रको मेसेर्स अदिब ट्रेडिङ नामक कम्पनीले चराका लागि चारो भन्दै पाकिस्तानबाट ९ अक्टोबरमा ३२ हजार १० किलो बराबर दुई कन्टेनर सामान ल्याएको थियो । पछि खानतलासी गर्दा उक्त कन्टेनरमा केबल ७ हजार २ सय किलोमात्रै चारो भेटिएको थियो । उक्त कार्गोमा २४ हजार ९ सय ६० किलो भने अफिमको बियाँ फेला परेको थियो ।

बंगलादेशमा अफिम प्रतिबन्धित छ । त्यहाँको नार्कोटिक नियन्त्रण ऐन २०१८ अनुसार अफिमलाई ‘ए’ श्रेणिको लागूऔषध मानिन्छ ।