काठमाडौं- खैबर पख्तुनख्वा प्रान्तमा सुरक्षा अवस्था खराब बन्दै गएकोमा पाकिस्तानको मानव अधिकार आयोगले चिन्ता व्यक्त गरेको छ । मानव अधिकार आयोगले खैबर पख्तुनख्वा प्रान्तमा भय, दण्डहीनता र नागरिक अधिकारको अवस्था खस्किँदै गएको जनाएको छ ।

आयोगले प्रतिवेदन जारी गर्दै सन् २०२५ मा पाकिस्तानभर भएका दुई तिहाइ आतङ्ककारी आक्रमणका घटना खैबर पख्तुनख्वामा मात्रै भएको उल्लेख गरेको छ । पाकिस्तानबाट प्रकाशित हुने द एक्सप्रेस ट्रिब्युनका अनुसार आयोगको प्रतिवेदनमा प्रान्तका केही जिल्लाहरु अझै पनि हिंसाको केन्द्रविन्दु रहेको जनाइएको छ ।

सो क्षेत्रका नागरिकमा असुरक्षा, जबरजस्ती विस्थापन र न्यायमा सीमित पहुँच रहेको जनाइएको छ । आयोगले आफ्नो प्रतिवेदनमा नागरिक हताहती र गोप्य सूचनाका आधारमा हुने सैन्य कारवाही नियमित बन्दै गएकोमा पनि चिन्ता जाहेर गरेको छ ।

त्यसैगरी, कतिपय सुरक्षासम्बन्धी निर्णयहरु स्थानीय प्रहरी र सुरक्षाकर्मीको सहभागिताबिनै लिने गरिएको छ । यसबाट पनि कानुन र व्यवस्था बहाल गर्न कठिन भइरहेको आयोगले उल्लेख गरेको छ ।