काठमाडौं– विश्वशान्ति र मानवकल्याणहेतु काठमाडौंको डोल्पो समाज गुम्वामा आयोजना गरिएको शान्ति पूजा सम्पन्न भएको छ ।
 
गत मंगलबारबाट सुरु भएर चार दिनसम्म चलेको शान्ति पूजा शुक्रबार सम्पन्न भएको हो । माथिल्लो डोल्पाका ६७ जना रिम्पोछो गुरु, सयभन्दा बढि लामा गुरुहरु र अन्य विदेशी बौद्ध धर्म गुरु र अनुयायीहरुले सामूहिक रुपमा शान्ति पूजा गरेका थिए । 

सोही अवसरमा डोल्पा मार्गोम गुम्वाका प्रमुख रिम्पोछे स्वर्गीय क्याव्जे मार्गोम रिम्पोछेको सम्झनामा निर्मित स्तुपामा बौद्ध परम्परा अनुसार प्राण प्रतिष्ठा गरिएको थियो । 

डोल्पो समाजका अध्यक्ष निमा रिम्पोछोले समग्र विश्व शान्ति र मानवकल्याणका साथै देशमा शान्तिका लागि पूजा आयोजना गरिएको जानकारी दिए । 

सोहि अवसरमा माथिल्लो डोल्पाबाट चिसो छल्न काठमाडौैं आएका डोल्पावासीले आफ्नो परम्परागत सास्कृतिक नाचहरुसमेत प्रस्तुत गरेका थिए ।