काठमाडौं- शुक्रबार मात्रै राष्ट्रिय स्वतन्त्र पार्टी परित्याग गरेका सन्तोष परियार, प्रगतिशील राष्ट्रिय अभियानका संयोजक सुदन किराती र नेपाल समाजवादी पार्टी नयाँ शक्तिकी संयोजक दुर्गा सोवबीच पाँच बुँदे सहमतिमा हस्ताक्षर भएको छ। उनीहरूबीच राजनीतिक सहकार्यको पहिलो खुट्किलोस्वरुप सहमति भएको हो ।

ललितपुरमा दिनभर भएको वार्तापछि पाँच बुँदे सहमतिमा एकता तथा ध्रुवीकरणका लागि नयाँ बन्ने एकीकृत पार्टीको नाम र चुनाव चिह्न एउटै हुने भनिएको छ ।

तीनजनाबीच भएको सहमतिको पाँच नम्बर बुँदामा भ्रष्ट, अनैतिक र अहङ्कारी प्रवृत्तिहरूलाई निर्वाचनबाटै परास्त गर्न सम्पूर्ण नयाँ तथा वैकल्पिक शक्तिहरू र नवयुग युवाहरू (जेन-जी) लाई हातेमालो गर्न अपिल गरिएको छ ।

नवयुवाका रुपमा उनीहरूले जेन-जी उमेर समूहलाई पनि आफूहरूसँग हातेमालो गरेर अगाडि बढ्न अपील गरेका हुन् । प्रगतिशील राष्ट्रिय अभियानका संयोजक सुदन किरातीले जेन-जीलाई पनि समेटेर नयाँ राजनीतिक यात्रा अघि बढाउने बताएका छन् ।

किरातीका अनुसार यो अभियान र पार्टीमा थुप्रै जेन-जी समेटिन सक्ने छन् । यस्तै देश तथा विदेशमा बस्ने प्रगतिशील, लोकतान्त्रिक,वामपन्थी र देशभक्त शक्ति तथा जेन-जी पुस्तालाई बृहत् राजनीतिक पुनरसंरचनाको अभियानमा सहभागी हुन पनि उनीहरूले भनेका छन् ।