काठमाडौं– केन्द्रीय राष्ट्रपति रनिङ शिल्ड तथा विश्वविद्यालय खेलकुद प्रतियोगिता आयोजनाका लागि पाँच वर्षसम्म निजी क्षेत्रले सहकार्य गर्ने भएको छ । 

आर्थिक वर्ष २०८२/०८३ मा प्रतियोगिताहरू सञ्चालन गर्न राष्ट्रिय खेलकुद परिषद् र नेपालय ईन्टरनेशनल ईभेन्ट म्यानेजमेन्ट प्रालिबीच आज सम्झौता भएको हो । परिषद्का सदस्य सचिव टंकलाल घिसिङ र नेपालयका अध्यक्ष शुवाष प्रधानले सम्झौता पत्रमा हस्ताक्षर गरेका छन् ।

नेपाल सरकारबाट विनियोजन भएको रकमका साथै प्रायोजक खोजी गरि प्रतियोगिताहरूलाई थप प्रभावकारी रूपमा आयोजना गर्ने उद्देश्यले सम्झौता गरिएको हो ।

प्रतियोगिताका लागि नेपाल सरकारले विनियोजन गरेको रकममा निजी क्षेत्रले राष्ट्रपति रनिङ शिल्डका लागि कम्तीमा २० लाख र विश्वविद्यालय खेलकुदका लागि कम्तीमा १० लाख रुपैयाँ नेपालयका तर्फबाट प्रायोजन गरिने सम्झौतामा उल्लेख गरिएको छ । यस्तै प्रत्येक वर्ष १० प्रतिशतका दरले प्रायोजन वृद्धि हुने उल्लेख गरिएको छ । 

नेपालयले प्रायोजकहरू खोजी गरी संकलन भएको रकम पारदर्शी रूपमा परिषद्लाई विवरण उपलब्ध गराउनेदेखि खर्च भई खुद नाफा भएमा सो को १० प्रतिशत रकम परिषद्को आम्दानी खातामा जम्मा गर्नु पर्ने छ ।