काठमाडौं– राष्ट्रिय स्वतन्त्र पार्टी (रास्वपा)का सचिवालय सदस्य सन्तोष परियारले पार्टी पद तथा साधारण सदस्यबाट राजीनामा दिएका छन् । उनले महामन्त्रीलाई पत्र बुझाउँदै पार्टीमा रहँदा गरेको योगदानप्रति कृतज्ञता व्यक्त गरे।

परियारले आफूले पार्टी र देशका हितका लागि इमानदार रूपमा काम गरे पनि पार्टीभित्र आवश्यक विचार बहसलाई स्थापित गर्न नसकेकोमा आत्मसमीक्षा गर्दै कमजोरी स्वीकार गरेका छन् । 

उनले नेपाली समाजको संरचना अनुसारको वैकल्पिक राजनीतिक विचार निर्माणमा चुनौती रहेको उल्लेख गरे ।

उनले भदौ २३ र २४ गते भएको जेन–जी आन्दोलनलाई नेपाली राजनीतिको जडता तोड्ने ऐतिहासिक घटनाका रूपमा व्याख्या गर्दै अबको राजनीति नयाँ पुस्ताले पुनर्परिभाषित गर्नुपर्ने बताए ।

परियारका अनुसार बदलिँदो परिस्थिति र सामाजिक चेतनाले नयाँ प्रकारको राजनीतिक अभियान आवश्यक बनाएको छ।

यिनै कारणले आफू रास्वपाको कुनै पनि जिम्मेवारीमा नबस्ने र पार्टीको साधारण सदस्य समेत नरहने निर्णय गरेको उनले पत्रमा उल्लेख गरेका छन्। रास्वपामा रहँदा साथ र सहयोग गर्ने सबैप्रति उनले आभार प्रकट गरेका छन्।

परियारले देश निर्माण र समाज रूपान्तरणका यात्रामा भविष्यमा पनि फेरि सहकार्य हुने विश्वास व्यक्त गरेका छन्।