काठमाडौं- रवि लामिछाने नेतृत्वको राष्ट्रिय स्वतन्त्र पार्टी छाडेका पूर्वप्रमुख सचेतक सन्तोष परियार जनार्दन शर्मा नेतृत्वको अभियानमा जोडिने भएका छन्।

विघटित प्रतिनिधिसभामा प्रमुख सचेतक समेत रहेका परियारले रास्वपा छाडेपछि उनी शर्माको अभियानमा जोडिन लागेका हुन् ।

माओदीले गत कात्तिक १९ गते बनाएको नेपाली कम्युनिस्ट पार्टीमा नगएका पूर्वउपमहासचिव जनार्दन शर्मा पक्षका नेता-कार्यकर्ताले पूर्वसांसद सुदन किरातीको नेतृत्वमा बिहीबार ‘प्रगतिशील राष्ट्रिय अभियान’ गठन गरेका छन्। त्यही अभियानमा परियार पनि जोडिने निर्णयमा पुगेका हुन् ।

परियारले पार्टीमा पछिल्लो समय कलह बढ्दै गएपछि छाड्नुपरेको बताएका छन् । उनले रास्वपा छाडेको पुष्टि प्रवक्ता मनिष झाले गरेका छन् । परियार रास्वपाको सचिवालय सदस्य पनि हुन् ।

‘विघटित प्रतिनिधि सभाको रास्वपाका प्रमुख सचेतकको जिम्मेवारीमा रहनुभएका सन्तोष परियारले कार्यवाहक सभापति तथा महामन्त्रीलाई पत्र बुझाएर पार्टी छोड्नु भएको जानकारी गराउनु भएको छ’, झाले भने, ‘राजनीतिमा नयाँ अभियानको साथ अगाडि बढ्ने योजनामा हुनुहुन्छ भन्ने कुरा वहाँले जानकारी गराउनु भएको छ।’

यसअघि रास्वपाबाट पूर्वमन्त्री एवम् सुमना श्रेष्ठ बाहिरिएकी थिइन्। उनी अब कहाँ जाने अझै पनि टुंगो भएको छ। रास्वपामा पछिल्लो समय तोषिमा कार्की र गणेश कार्कीसहितले पनि चर्को असन्तुष्टि जनाइरहेका छन् ।