काठमाडौं – टेलिसिरियल ‘भद्रगोल’ र ‘सक्किागोनि’बाट चर्चा कमाएका अर्जुन घिमिरे ‘पाँडे’को डेब्यू निर्देशन रहेको फिल्म ‘झरीपछिको इन्द्रेणी’ प्रचार गर्न काठमाडौं महानगरपालिकाका मेयर बालेन्द्र शाहको युट्युब च्यानल प्रयोग गरिने भएको छ ।

फिल्मको प्रचार सामाग्रीका रुपमा पहिलो गीत ‘फसायो लमीले’ मेयर शाहको युट्युब च्यानबाट सार्वजनिक गर्ने बताइएको छ । यो गीत शनिबार बिहान सार्वजनिक हुने बताइएको छ ।

यस गीतको भिडियोमा नायिका दीपाश्री निरौला, मोडेल अञ्जली अधिकारी र प्रदीप लामा फिचर्ड हुने निर्माण पक्षले जनाएको छ ।

गीतमा गायिका समीक्षा अधिकारी र गायक वसन्त थापाको युगल स्वर रहनेछ । यसमा शब्द र संगीत संयोजन रमेश परियारको रहेको छ ।

र्‍याप पृष्ठभूमिका मेयर शाहको सामाजिक सञ्जाल चर्चामा छ । पाँडेले उनको लोकप्रियता प्रयोग गरेर यस फिल्मको प्रचार गर्न लागेका हुन् । पाँडे मेयर बालेन्द्रको कोर टिमको सदस्यसमेत हुन् ।

बालेन्द्रको युट्युब च्यानल ‘बालेन’मा आठ लाखभन्दा बढी सस्क्राइबर छन् ।

पाँडे र कुमार कट्टेल ‘जिग्री’ले निर्माण गरेको पहिलो फिल्म ‘लाज शरणम्’मा पनि बालेन्द्रले एक र्‍याप गीत गाएका थिए ।

झरीपछिको इन्द्रेणीमा गणेश उप्रेती, रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन, अर्जुन घिमिरे, प्रियना आचार्य, अंशु महर्जन, राजेन्द्र नेपाली, लक्षणा राईलगायतको अभिनय रहेको छ।

नागराज इन्टरटेन्मेट प्रालिको ब्यानरमा बनेको यस फिल्मको निर्मात्री सेन्दान लिम्बू हुन् ।

यस फिल्मको प्रदर्शन मिति पुस ४ लाई तोकिएको छ ।