काठमाडौं– नेपाली कांग्रेसका नेता कृष्ण सिटौलाले सरकारले निर्वाचनको वातावरण तयार पार्नुपर्ने बताएका छन् । 

सरकारले शान्ति सुरक्षा कायम गरेर निर्वाचनको वातावरण तयार पारे आफूहरू निर्वाचनमा सहभागी हुने समेत उनले उद्घोष गरे । 

मंगलबार केन्द्रीय कमिटी बैठकपछि बाहिरिने क्रममा पत्रकारहरूसँग कुरा गर्दै सिटौलाले कांग्रेस निर्वाचनबाट कहिल्यै नभागेको बताउँदै सरकारलाई निर्वाचनको माहौल बनाउन आग्रह गरे । 

‘इतिहास हेर्नुहोला विभिन्न चुनौतीहरूमा त कांग्रेस निर्वाचनबाट भागेको छैन । सरकारले निर्वाचनको वातावरण बनाए हामी निर्वाचनमा सहभागी हुन तयार छौँ ।’, सिटौलाले भनेका छन्, ‘प्रतिनिधिसभा पुनर्स्थापनाका लागि पनि अदालतको ढोका खुल्लै छ। हामी निर्वाचनको माहौल नबनाए यो विकल्पमा पनि जान सक्छौँ ।’

उनले जेन-जीले उठाएका कतिपय मागहरू सकारात्मक रहेको बताउँदै कांग्रेस यस्ता मागहरूलाई पूरा गर्न प्रतिबद्ध रहेको बताए ।