काठमाडौँ- गत भदौ २४ गतेको जेन-जी आन्दोलनका क्रममा निजी निवास बूढानीलकण्ठमा हातपात भएयता पहिलो पटक सार्वजनिक भएका नेपाली कांग्रेसका सभापति शेरबहादुर देउवा अन्तरिम सरकारबारे प्रश्न उठाएका छन् ।

उनले केन्द्रीय कार्यालय सानेपामा उपस्थित नेपाली कांग्रेसका नेताहरूलाई सम्बोधन गर्दै सुशीला कार्की नेतृत्वको अन्तरिम सरकारले दलहरूसँग सहकार्य गर्न नचाहेको देखिएको बताएका छन् ।

‘देशमा अब द्वन्द्व हुनु आवश्यक छैन । देशमा विकसित नयाँ परिस्थिति अनुसार पार्टीलाई एकताबद्ध बनाउनुपर्छ’, उनले भने, ‘पार्टीको आन्तरिक जीवन सुदृढ गरेर १५ औँ महाधिवेशन गर्ने प्रस्ताव भएको छ । हामीले अहिलेको अवस्थामा अन्य राजनीतिक दलसँग सहकार्य गर्न आवश्यक छ ।’

देउवाले असंवैधानिक रुपमा संसद् विघटन गरिएको पनि बताए । ‘अहिले नै स्वतन्त्र र निष्पक्ष रुपमा निर्वाचन हुने ग्यारेन्टी छैन । निर्वाचनका लागि शान्ति सुरक्षाको अवस्था राम्रो हुनुपर्छ । शान्ति सुरक्षा र भयरहित अवस्था बनाउने काम सरकारले गर्नुपर्छ’, उनले भने, ‘बहुदलीय लोकतान्त्रिक व्यवस्थामा सरकारले दलहरूसँग संवाद गर्नु जरूरी छ । तर त्यसो गरेको देखिएको छैन ।’

उनले कांग्रेस नेताहरूलाई एमालेसहितका अन्य दलहरूसँग पनि संवाद गर्न सुझाए । ‘यस्तो अवस्थामा अन्य दलहरूसँग हामीले संवाद गर्नुपर्छ । देशको राष्ट्रियता र लोकतन्त्रको रक्षा गरिनुपर्छ’, उनले भने, ‘म लामो राजनीतिक यात्रापछि यहाँसम्म आएको हुँ। देश र जनताप्रति सकेसम्म प्रतिबद्ध रहनेछु । नेपाली कांग्रेसलाई सधैँ माया गर्दै आएको छु ।’

उनले नेपालमा भ्रष्टाचार निवारणका लागि आफूले कैयौँ काम गरेको पनि बताए । ‘छुवाछुत हटाउन पनि मैले काम गरेको छु । महिला अधिकारका लागि काम गरेको छु’, उनले भने, ‘मेरो राजनीतिक जीवन नै देशका लागि समर्पण गरेको छु ।’